Category Archives: Tilkynningar

Tilkynningar til félaga.

Kynningarferð nýliða á Helgafell 5. september

Í góða veðrinu í dag, fimmtudag 5. september, verður farin kynningargönguferð á Helgafell. Þar mæta bæði félagar í HSSR og nýliðar sem eru að hugsa um að hefja þjálfun í haust. Þægilegur göngutúr þar sem nýliðar byrja að kynnast hver öðrum og einnig félögum í sveitinni.

Mæting á Malarhöfða 6 og brottför kl. 18:00. Farið á bílum HSSR og einkabílum ef þörf er á.

Fyrsta námskeið nýliða hefst síðan miðvikudagskvöld 11. september og þá rennur einnig umsóknarfrestur út. Umsóknarformið er hér.

Kynningarbæklingur er hér.

Kynning á nýliðaþjálfun HSSR

Hjálparsveit skáta í Reykjavík mun halda kynningu á nýliðaþjálfun sveitarinnar nk. þriðjudag 3. september kl. 20 að Malarhöfða 6. Þar verður farið vel yfir alla þætti nýliðastarfsins í máli og myndum og geta gestir fengið þar svör við öllum spurningum sem upp kunna að koma í tengslum við málefnið. Allir sem hafa áhuga á því að kanna hvort nýliðaþjálfun í björgunarsveiti henti þeim eru hvattir til þess að mæta og kynna sér málið.

Kominn er út bæklingur sem inniheldur margvíslegan fróðleik um nýliðastarfið og er hægt að nálgast hann hér.

Hægt er að fylla út umsókn hér: bit.ly/hssr-umsokn-2013. Frekari upplýsingar má fá með pósti á netfangið hssr.nylidar.2013@gmail.com.

Viðbót 4. september kl. 21:20: Fimmtudaginn 5. september verður farið í létta göngu á Helgafell í Hafnarfirði. Væntanlegir nýliðar geta annað tveggja mætt kl. 17:45 á Malarhöfða 6, en þaðan verður lagt af stað með rútu kl. 18 eða mætt beint á bílaplanið við Helgafell, en lagt verður af stað þaðan kl. 18:30. Við vonumst til þess að sjá sem flesta, veður verður með besta móti þannig að þetta verður hin besta skemmtun!

Vilt þú verða nýliðaforingi?

Auglýst er eftir áhugasömum félögum til að taka að sér umsjón með nýliðum sem hefja þjálfun næsta haust. Leitað er að tveimur félögum sem:

Hafa starfað með sveitinni sem fullgildir félagar í a.m.k. 2 ár
Eru vel tengdir innan sveitarinnar og hafa reynslu af sem flestum þáttum í starfinu
Eiga gott með að vinna með alls konar fólki
Eru reiðubúnir að sjá um nýliðastarf þangað til nýliðarnir ganga inn í sveitina árið 2015
Eru gjarnan af sitt hvoru kyninu

Einstaklingar geta sótt um en svo er líka hægt að sækja um tvær, tveir eða helst tvö saman. Þeir sem hafa áhuga sendi upplýsingar til Einars Ragnars á netfangið eragnarsig@gmail.com fyrir næsta stjórnarfund sem er þriðudag 16. apríl kl. 18. en þá verða umsóknir skoðaðar.

– Stórn HSSR

Gönguskíði

Eftirfarandi er gönguskíðadagskrá HSSR fyrstu vikuna í febrúar:

Fimmtudagur 7. febrúar kl. 18, æfingaferð (líklega í Bláfjöllum).
Laugardagur 9. febrúar, dagsferð á skíðum.

Eftirbátar munu sjá um æfingar og kennslu.

Í Bláfjöllum verður hægt að fá leigð skíði fyrir þá sem ekki eiga og einhver ráð verða með að bjarga skíðum skíðalausum í dagsferðinni einnig.

Skráning er í D4H.

Yfirleiðbeinandi í fyrstu hjálp óskast

Merki Slysavarnafélagsins Landsbjargar.

Björgunarskólinn auglýsir eftir umsóknum um lausa stöðu yfirleiðbeinanda í fyrstu hjálp.
Skólinn leitar að öflugu björgunarsveitarfólki með mikla reynslu á sviði fyrstu hjálpar. Starf yfirleiðbeinanda Björgunarskólans felst meðal annars í:

kennslu sem yfirleiðbeinandi við Björgunarskóla Slysavarnarfélagsins Landsbjargar
vinnu við gerð og fullvinnslu kennslugangna og tryggja að námsefni sé uppfært reglulega
setu í skyndihjálparráði fyrir hönd Björgunarskóla SL
samskipti við erlenda tengiliði á sviði fyrstu hjálpar

Einnig skal yfirleiðbeinandi:

fylgjast með nýjungum á sviðið fyrstu hjálpar sem skólinn mun gefa út og nota fyrir nemendur skólans sem og við námskeið á vegum félagsins
halda utan um fagnámskeið í faginuendurmenntun leiðbeinenda
fjarnámskeið auk þess að vera virkum leiðbeinendum í fyrstu hjálp innan handar.

Umsækjendur skulu skila inn yfirliti yfir menntun og reynslu.

Ekki er um að ræða fulla stöðu heldur er gerður verktakasamningur við viðkomandi. Umsólknarfrestur er til 1. febrúar næstkomandi og er gert ráð fyrir að gengið verði frá ráðningu fyrir 15. febrúar 2013. Frekari upplýsingar veitir Dagbjartur Kr. Brynjarsson, skólastjóri Björgunarskólans, í netfanginu dagbjartur@landsbjorg.is.

Skönnun gamalla ljósmynda

Laugardaginn 26. janúar verður skönnunardagur í HSSR, en þá munu nokkrir félagar hittast á M6 og skanna gamlar ljósmyndir úr sveitarstarfinu af pappír og filmu. Af því tilefni eru eldri félagar hvattir til þess að kíkja í gömul myndaalbúm, finna myndir og koma þeim til skrifstofu HSSR fyrir þann tíma svo hægt sé að koma þeim inn í ljósmyndasafn sveitarinnar.

Frekari upplýsingar gefur Óli í netfanginu olijon@gmail.com eða síma 699-1000. Hafið endilega samband ef eitthvað er.

Áhugasamir félagar sem eiga góða skanna og fartölvu eru hvattir til þess að líta við á M6 og taka þátt í skemmtilegu og þörfu verkefni.

Flugeldar og aftur flugeldar :)

Knáir sölumenn bregða á leik með afmælisskotköku HSSR.

Hér á Malarhöfðanum er allt farið á fullt fyrir undirbúning flugeldavertíðar sem hófst formlega í dag með uppsetningu sölustaða víðs vegar um bæinn. Sölustaðir eru staðsettir í Spönginni, Mjóddinni, Grafarholti, Norðlingaholti, Bílbúð Benna, Malarhöfða 6 og hjá Skjöldungi. Salan hefst kl. 14:00 á morgun, föstudaginn 28. desember.

Margir leggja hönd á plóginn til að hlutirnir geti gengið upp – við getum þó sannarlega bætt við okkur mannskap og hvetjum því sem flesta félaga að skrá sig á söluvaktir sem allra fyrst. Sendið póst á hssr@hssr eða hafið samband í s. 5571212.

Sjáumst í flugeldavinnunni!

Hópstjóranámskeið á Hellu 18.-20. janúar

Létt samvinnuæfing frá hópstjóranámskeiði í febrúar 2012.

Námskeiðið er ætlað stjórnendum sem starfa innan björgunarsveita, bæði fyrir stjórnendur útkallshópa og hópstjóra í útköllum. Einnig þau sem vilja gefa kost á sér í þessi verkefni. Námskeiðið er 24 kennslustundir og er hluti af björgunarmanni 2. Það byggist upp á verklegum æfingum, sýnikennslu og fyrirlestrum. Vegna dagskrár og uppbyggingar er nauðsynlegt að þátttakendur gisti. Nánari upplýsignar og skráning er á vef Björgunarskólans, landsbjorg.is.

Stjórn HSSR hvetur virka félaga sem eru hópstjórar eða hafa hug á því að taka það hlutverk að sér að sækja námskeiðið.

Stjórn skiptir með sér verkum

Yfirlit yfir verkaskiptingu stjórnar HSSR 2012-13.

Ný stjórn hefur fundað tvisvar frá aðalfundi og eitt af hennar fyrstu verkum var að skipta með sér ábyrgðarstöðum og ábyrgðarsviðum. Þorbjörg er 1. aðstoðarsveitarforingi, Hilmar 2. aðstoðarsveitarforingi, Kristjón heldur ritarastarfinu og Tómas tekur við starfi gjaldkera. Meðstjórnendur eru Sigþóra og Einar Ragnar.

Nánar má lesa um ábyrgðarsvið á töflu í andyri auk þess að upplýsingar um þau eru sett sem gögn á heimasíðuna.

Afmælissamæfing 2012

Afmælissamæfing HSSR 2012 verður haldin laugardaginn 24. nóvember nk. Þetta er útkallsæfing og verða þátttakendur boðaðir með SMS kl. 8 um morguninn, en hópar eiga að vera tilbúnir í verkefni kl. 9.
Í æfingunni verður reynt á ólíka þætti björgunarstarfsins. Þátttakendur eru beðnir um að gæta þess að vera vel merktir í Landsbjargarfatnaði og með allan venjulegan persónulegan öryggisbúnað.
Lokafrestur til skráningar er kl. 10 árdegis föstudaginn 23. nóvember og eru félagar hvattir til þess að gera grein fyrir mætingu sinni fyrir þann tíma.

—————-
Höfundur: Ólafur Jón Jónsson