Nýliðaþjálfun HSSR

Í HSSR er boðið upp á öfluga nýliðaþjálfun sem hefst í byrjun september ár hvert. Dagskráin verður kynnt á opnum fundum þann 25. og 27. ágúst þar sem áhugasömum gefst tækifæri á að kynna sér þjálfunaráætlun nýliða, starf sveitarinnar, aðstöðuna og tækin. Þar er einnig hægt að hitta nýliða og félaga sveitarinnar og fá svör við spurningum.

Fundirnir fara fram í húsnæði sveitarinnar að Malarhöfða 6 (M6) og hefjast kl. 19:00.

Hagnýtar vefslóðir

Almennt um nýliðaþjálfun

Nýliðaþjálfunin tekur að jafnaði 21 mánuð. Mikil áhersla er lögð á liðsheild og samvinnu en jafn­framt á að byggja upp frumkvæði einstaklingsins sem og getu hans til sjálfs­bjargar. Á meðan þjálfuninni stendur kynnast nýliðar öllu því sem felst í starfi björgunarsveita og sækja skyldunámskeið, æfingaferðir, nýliðakvöld (haldin að jafnaði annan hvern mánudag) og taka þátt í fjáröflunum.

  • Fyrsta árið (N1) einblínir á grunnþjálfun í öryggi og færni fyrir aðstæður í björgunarstörfum. Það verður nóg að gera í námskeiðum, ferðum og æfingum!
  • Seinna árið (N2) krefst meira sjálfstæðis en á því fyrra. Nýliðar 2 hefja störf með hópum sveitarinnar og sjá enn meira um sinn framgang í þjálfuninni auk þess sem ljúka þarf nokkrum skyldunámskeiðum.

Þátttakendur þurfa að vera líkamlega og andlega vel undirbúnir, tilbúnir í krefjandi verkefni, með góð tök á íslensku og sýna frumkvæði og seiglu.

Mikilvægar dagsetningar haustið 2025

Ef þú hefur áhuga á þátttöku skaltu taka eftir eftirfarandi viðburðum:

📌 3. september: Kvöldganga á Helgafell í Hafnarfirði – mæting á M6 kl. 17:30.
📌 6. september: Dagsganga á Vörðuskeggja – mæting á M6 kl. 08:00.
📌 8. september: Búnaðarkynning á M6 kl. 19:00.
📌 10. september: Umsóknarfrestur nýliðaþjálfunar rennur út.
📌 12.-14. september: Námskeið í ferðamennsku og rötun á Úlfljótsvatni.
📌 23. september: Nýliðakvöld.
📌 26.-28. september: Helgargönguferð, gist í tjöldum.

✅ Mikilvægt: Ef þú ætlar að taka þátt í nýliðaþjálfun skaltu tryggja að þú getir verið með í þessum viðburðum!

Námskeið á þjálfunartímanum

Fyrsta árið er lögð áhersla á að nýliðar verði sjálfbjarga og geti tryggt eigið öryggi í björgunaraðgerðum. Helstu námskeið eru:

  • Ferðamennska og rötun
  • Fyrsta hjálp
  • Fjallamennska
  • Fjarskipti
  • Félagastuðningur
  • Gengið á jökli
  • Snjóflóð 1
  • Straumvatnsbjörgun
  • Leitartækni

Auk námskeiða taka nýliðar þátt í fjölmörgum ferðum, m.a. vetrarferðum með tjöldum, gönguskíðaferðum og snjóhúsabyggingu.

Fullgilding nýliða

Flestir félagar verða fullgildir 21 mánuði eftir að þjálfun hefst. Á meðan þjálfuninni stendur er hver nýliði metinn af umsjónarfólki þjálfunar sem og leiðbeinendum námskeiða. Matskröfur byggja á því að fólk nýtist í björgunarstarfi og er m.a. tekið mið af mætingu, frammistöðu, áhuga og félagslegri hæfni. Fullgilding nýliða fer fram á aðalfundi HSSR í maí, á seinni ári þjálfunar.

Til að ljúka þjálfun þarf að:
✅ Klára og standast ákveðin skyldunámskeið.
✅ Hafa tekið þátt og sýnt áhuga og frumkvæði á námskeiðum, í æfingaferðum og á nýliðakvöldum.
✅ Sýna virkni í starfi sveitarinnar og eiga gott með að vinna með hópi fólks.

Fjáröflun – mikilvægur hluti af starfinu

Starf HSSR er alfarið fjármagnað með fjáröflunum og því er ætlast til að nýliðar taki virkan þátt. Meðal fjáröflunarverkefna HSSR eru:

💥 Sala á flugeldum og Neyðarkalli
🚧 Viðhald gönguleiða á Hengilssvæðinu.
🎆 Uppsetning og framkvæmd flugeldasýninga.

Öflug þátttaka í þessum verkefnum er lykilatriði fyrir áframhaldandi starf sveitarinnar.

Hafðu samband

📧 Ef þú hefur spurningar, ekki hika við að senda okkur póst á nylidar@hssr.is.