Fjallamennska 1 var haldin þetta árið á Fimmvörðuhálsi. Þriðjudaginn 13. nóvember mættu nýliðarnir á undirbúningskvöld á M6 þar sem farið var yfir helstu efnisatriði og rennt yfir búnaðarlistann, hnútar kenndir, sig æft og lánsbúnaði útdeilt.
Að kvöldi föstudagsins 16. var svo haldið austur að Skógum og upp slóðann á Fimmvörðuháls. Færið var nokkuð þungt en Eiríkur Odds náði þó að koma Ásnum um tveimur kílómetrum að vaðinu þegar ákveðið var að halda áfram fótgangandi. Þaðan var svo þrammað í nöprum norðankalda og hressilegum skafrenningi upp að nýja Baldvinsskála þar sem gist var um nóttina.
Morguninn eftir var spáð allhvössum vindi sunnan við Hálsinn og því var ákveðið að halda norðuryfir, reyna að fara yfir helstu atriði námskeiðsins á leiðinni og ná niður í Bása um kvöldið. Veður lægði eilítið eftir morgunmat en batnaði mjög þegar yfir hálsinn var komið og Tindfjallajökull og Mörkin blöstu við í allri sinni dýrð. Sunnudagsmorguninn héldu hóparnir upp að Réttarfelli og hlíðunum ofan Bása í mikilli veðurblíðu til að fara yfir þau efnisatriði sem ekki náðist að klára daginn áður. Þrátt fyrir heldur lítinn og lausan snjó fengu nýliðarnir nasaþefinn af þessum helstu atriðum fjallamennsku.
Námskeiðið varð því að öllu meiri fjallamennskuferð en gert hafði ráð fyrir og stóðst hópurinn þetta verkefni með prýði.
-
- Farið yfir útbúnað og skipulag.
-
- Nýliðarnir fylgjast hugfangnir með.
-
- Ástþór lætur sig ekki vanta.
-
- Sigæfingar í salnum (smíði flugeldasölustaðanna í bakgrunni).
-
- Íbyggnir nýliðar og árvökulir leiðbeinendur.
-
- Hnýtt fyrir síðustu lausu endana fyrir ferðina.
-
- Tinni í góðum félagsskap Elvu og Jóhönnu.
-
- Dóri ávalt sprækur sem lækur.
-
- Það var nokkuð kalt á leiðinni upp að Baldvinsskála.
-
- Skrafað og kakó sopið meðan lífinu var aftur komið í lúkurnar.
-
- Skálafylli nýliða.
-
- Hvort sem er við ströndu eða á fjöllum hefst dagur margra á kaffibolla.
-
- Ottó sprettur á eftir nýliðunum sínum eftir að búið er að þrífa hjallinn.
-
- Óþekkti göngumaðurinn.
-
- Skraf og ráðagerðir á leið upp Hálsinn.
-
- Þrammað mót vindi.
-
- Danni kátur.
-
- Hress hópurinn á góðri stund fagnar á nýjustu viðbót þessarar skemmtilegu leiðar.
-
- Það hverfur ekki af manni brosið í svona félagsskap á góðum degi á fjöllum.
-
- Danni fer yfir fjallasýnina. Hvort hann hafi komið þangað einu sinni eða tvisvar áður?
-
- Haldið niður að Morinsheiði.
-
- Síðasta hópmyndin. Takið sérstaklega eftir sleikipinnanum hans Grétars.
-
- Matur í Básum.
-
- Marey með kjúklingakarbónarabombuna sína. Já, við Ottó samþykkjum hana (sérstaklega fyrst lambið átti enn nokkra stund á grillinu).
-
- Síðari dagurinn fór í yfirferð á eftirstandandi atriðum.
-
- Kári og Dóri fundu sér flottasta staðinn.
-
- Og þá er ekki lítið sagt því Mörkin öll er gullfalleg.
-
- Gengið frá. Bílahópur kominn að sækja liðið eftir að hafa tekið létta æfingu á svæðinu.
-
- Ásdís og Hanna Lilja að fara yfir undanfaraknippin meðan þær biðu eftir liðinu.
-
- Ökuþórinn Eiríkur og Guðrún kóari.
-
- Búnaðurinn tekinn inn.
-
- Og frá honum gengið.
—————-
Höfundur: Martin Swift