Laugardaginn 5. október tóku 12 félagar frá HSSR þátt í áframhaldi leitar að týndum ferðamanni við Landmannalaugar. Til að nýta dagsbirtuna sem best lögðu þeir af stað um fimm leytið að morgni og voru komnir heim skömmu eftir kvöldmat. Alls tóku um 100 manns af suður- og suðvesturlandi þátt í þessari aðgerðalotu.
Leit hefur enn engan árangur borið.
Rúmlega 20 félagar frá HSSR hafa tekið þátt í leit að bandarískum ferðamanni sem nú stendur yfir á svæðinu við Hrafntinnusker og Álftavatn. Veður hefur verið ágætt og samtals hafa um 150 björgunarmenn tekið þátt í aðgerðinni. Leit verður haldið áfram fram á kvöld, en þá verður staðan metin í samráði við lögreglu.
Aðfaranótt laugardagsins 1. júní barst sveitinni ósk um aðstoð vegna leitar að franskri konu í Mjóafirði við Ísafjarðardjúp. Í fyrstu var óskað eftir sérhæfðum leitarmönnum en síðar breyttist boðun í heildarútkall.
Frá HSSR fór einn hópur göngumanna vestur fyrir hádegi. Eftir kvöldmat fór Reykur 1 með tvo gönguhópa til viðbótar og félaga með leitarhund og búðatjaldið. Alls komu 25 manns frá HSSR að leitinni. Um þriðjungur þeirra tók líka þátt í fótboltagæslu fyrr um daginn en leitin féll saman við gæslu sem sveitin annaðist á landsleik kvenna í knattspyrnu, Ísland – Skotland.
Sveitin var boðuð út til leitar að týndum einstaklingi á höfuðborgarsvæðinu rétt fyrir hádegi í dag, föstudaginn 12. apríl. Aðgerðin hefur verið umfangsmikil og voru allar sveitir á höfuðborgarsvæðinu boðaðar auk sveita frá svæðum 2 og 4. Yfir 50 félagar í HSSR hafa tekið þátt í leitinni í dag. Leit verður haldið áfram á morgun, laugardag og hafa yfir 20 félagar boðað komu sína. Tjald sveitarinnar var einnig verið notað í aðgerðinni í dag og verður sett upp á morgun.
Síðdegis í gær, 25. mars, barst beiðni frá Neyðarlínu um aðstoð við slasaðan göngumann í Esju. Viðbragð félaga í HSSR var snöggt og var fyrsti bíll farinn úr húsi, fullskipaður, um 15 mínútum eftir að boðin bárust. Alls komu 21 félagar að þessari aðgerð og 12 voru í viðbragðsstöðu.
Aðgerðin gekk vel, hinn slasaði var fluttur á sexhjóli Kyndlismanna áleiðis að sjúkrabíl, þaðan sem hann var fluttur á slysadeild. Veður var gott.
Þetta var fysta útkall nokkurra nýinngenginna félaga og óskum við þeim alls góðs í störfum sínum fyrir félagið.
Hjálparsveitir á Svæði 1 var kölluð út í dag vegna manns sem fótbrotnaði í Botnsúlum. Frá HSSR fóru alls 10 manns með snjóbíl og snjósleða með í för.
Aðgerðin gekk vel, hinn slasaði var fluttur á börum áleiðis að þyrluni sem flutti hann á slysadeild. Veður var þokkalegt en heldur snjólítið var fyrir tækin okkar.
Alls komu 20 manns að aðgerðinni.
HSSR var boðuð út kl. 6:45 í gærmorgun, miðvikudaginn 6. mars, til aðstoðar vegna ófærðar á höfuðborgarsvæðinu, sérstaklega í efri byggðum. Mikil ofankoma og hvassviðri einkenndi aðstæður fyrri hluta dags og á köflum var mjög blint veður. Sveitin sinnti fjölda verkefna en áhersla var lögð á að halda stofnbrautum greiðum sem og að aðstoða fólk með börn og sjúklinga. Dregið var úr viðbúnaði þegar líða fór á daginn og um kvöldmatarleytið voru allir hópar komnir í hús.
Slysavarnardeild kvenna í Reykjavík kom færandi hendi á Malarhöfðann um hádegisbil og tók til næringu fyrir björgunarfólk. Hópar af öllu höfuðborgarsvæðinu nýttu sér þennan höfðingsskap þeirra og þáðu heita súpu, smurt brauð, kaffi og nýbakaða köku.
Alls komu 31 manns frá HSSR að útkallinu og um 20 manns til viðbótar voru tilbúnir að koma með skömmum fyrirvara. Í dag, fimmtudag, hefur veðrið gengið niður og svæðisstjórn telur ekki þörf á frekari viðbúnaði.
Kl. 01:05 barst Hjálparsveit skáta í Reykjavík tilkynning um útkall og var um að ræða týnda konu á höfuðborgarsvæðinu.
Alls brugðust 10 félagar við og mættu upp á Malarhöfða 6 og aðrir 7 lýstu sig reiðubúna til þess að mæta síðar ef þörf krefði. Útkallið var afturkallað rúmlega 40 mínútum síðar þegar konan fannst heil á húfi.
Félögum í Hjálparsveit skáta í Reykjavík barst tilkynning í kvöld kl. 22:33 þess efnis að Boeing 757 þota væri að koma inn til lendingar á Keflavíkurflugvelli með bilaðan vökvabúnað. Alls brugðust 26 félagar við og var fyrsti hópurinn farinn úr húsi þegar afturköllun barst 17 mínútum síðar.
Hjálparsveit skáta í Reykjavík var kölluð til leitar að göngumanni í Esjunni í dag. Maðurinn, sem varð viðskila við félaga sinn, var á ferð á Kerhólakambi og villtist. Fóru þeir sitthvora leiðina niður. Þegar annar þeirra skilaði sér ekki var kallað eftir aðstoð frá Neyðarlínu. Maðurinn fannst 5 tímum síðar, heill húfi. Aðstæður voru erfiðar framan af, vindur 18-20 m/s og slæmt skyggni, en þegar leið á aðgerðina rofaði til.
Alls komu 30 félagar HSSR að þessu útkalli.