09.09.20 / Póstur til umsækjenda
Rétt í þessu fór út tölvupóstur til umsækjenda með upplýsingum um dagskrá helgarinnar. Kynnið ykkur efni póstsins, farið yfir búnað og gerið áætlun um matarmál. Þá er vefslóð í kennslubók í Ferðamennsku og rötun, rennið yfir hana fyrir námskeiðið.

08.09.20 / Búnaðarkynning er í kvöld kl. 20
Í kvöld, á Malarhöfða 6, mun reyndur félagi opna bakpoka sinn og dufful og fræða gesti um þann búnað sem þar er að finna. Þarna verður að finna mikinn og kjarngóðan fróðleik um hvað er gott að hafa með sér í ferðum og því vel þess virði að mæta og njóta.
Rétt er að tiltaka sérstaklega að kynningin er kl. 20, en ekki kl. 19 eins og fram kom á kynningarkvöldi. Þá er vert að minna á að umsóknarfrestur í nýliðaþjálfun rennur út á miðnætti í kvöld, þriðjudaginn 8. september.
Um næstu helgi er svo námskeiðið Ferðamennska og rötun og eru umsækjendur beðnir um að skrá sig á það hið fyrsta.

06.09.20 / Lokafrestur til að sækja um vist í nýliðaþjálfun
Við minnum á að sækja verður um vist í nýliðaþjálfun ekki síðar en þriðjdagskvöldið 8. september. Það kvöld er einnig námskeiðið Búnaðarkynning og geta umsækjendur skráð sig á það hér.

03.09.20 / Skráning á námskeið
Umsækjendur eru beðnir um að skrá sig á námskeiðin Búnaðarkynning og Ferðamennska og rötun (sjá neðar) með því að fylla út form.

01.09.20 / Til þeirra sem íhuga að sækja um í nýliðaþjálfun.
Fimmtudaginn 3. september verður gengið á Helgafell í Hafnarfirði. Best er að þátttakendur komi sér sjálfir á bílastæðið þar og verði mættir kl. 18:20. Þetta er létt upphitun fyrir veturinn þar sem væntanlegir nýliðar ganga með umsjónarfólki þjálfunar.

Þriðjudaginn 8. september kl. 20 er búnaðarkynning á Malarhöfða 6 (M6). Þar mun reyndur félagi sýna okkur hvað hann er með í pokanum sínum og gefa góð ráð í þeim efnum. Þarna rennur út lokafrestur til að skila inn umsókn.

Föstudaginn 11. september verður farið að Úlfljótsvatni með brottför frá M6 kl. 18. Um er að ræða helgarnámskeið og er gist eystra fram á seinni part sunnudags. Þetta er grunnnámskeið í þjálfun nýliða.

Eftir þetta tekur við dagskrá þjálfunarinnar eins og hún er kynnt í bæklingi.

---

Í HSSR er boðið upp á öfluga nýliðaþjálfun sem hefst í byrjun september ár hvert. Dagskráin er kynnt á opnum fundum, 27. ágúst og 1. september kl. 20, þar sem áhugasömum gefst tækifæri á að sjá þjálfunaráætlun nýliða, kynnast starfi sveitarinnar, skoða aðstöðuna og tækin ásamt því að hitta nýliða og fullgilda félaga og spyrja spurninga. Fundirnir verða í fullu samræmi við gildandi takmarkanir í samkomubanni vegna Covid-19.

Fundirnir verða fyllilega í samræmi við allar kröfur sem gerðar eru vegna Covid-19. Til þess að hægt verði að tryggja réttan fjölda fólks og lágmarks fjarlægð á milli gesta biðjum við áhugasama um að skrá sig á þann fund sem hentar þeim. Verði skráðir gestir fleiri en salurinn rúmar munum við upplýsa fólk í tölvupósti. Fundinum verður streymt á Facebook á vefslóðinni facebook.com/reykur.

Skráðu þig á kynningarfund.

Hagnýtar vefslóðir
Kynningarbæklingur um nýliðastarfið síðastliðið starfsár.
Umsókn um þjálfun sem nýliði í HSSR.

Almennt um nýliðaþjálfun
Fyrir flesta nýliða tekur þjálfun 20 mánuði. Á þeim tíma kynnast væntanlegir félagar því hvað fylgir því að starfa í björgunarsveit og fara á námskeið til þess að styrkja þá í væntanlegu starfi þeirra í sveitinni. Fyrra árið þjálfar fólk sem nýliðar 1 (N1), en færast upp í nýliða 2 (N2) seinna tímabilið ef öll áskilin námskeið hafa verið kláruð. Þátttakendur þurfa að vera vel á sig komnir líkamlega og andlega, reiðubúnir til að takast á við fjölbreytileg og erfið verkefni, hafa góð tök á íslenskri tungu og vera tilbúnir til þess að sýna frumkvæði og styrk.

Gott að vita ef þú ert að velta fyrir þér þátttöku í nýliðaþjálfun
Í byrjun þjálfunar eru nokkrir viðburðir sem nýliðar þurfa að mæta í og eru þeir helstir þessir:

• Kvöldganga (3. september), ekki skylda, mæting á M6.
• Búnaðarkynning (8. september)
  • Lokafrestur til þess að skila inn umsókn um vist í nýliðaþjálfun
• Ferðamennska og rötun (11.-13. september), haldið á Úlfljótsvatni
  • Fyrir þetta námskeið þarf að hafa eftirfarandi búnað
    • Áttaviti (helst með spegli)
    • Reglustiku (og gráðubogi er æskilegur)
    • Ritföng og pappír
• Þrekæfing (15. september)
• Helgargönguferð (25.-27. september), gist í tjöldum eða skála

Takið þessar dagsetningar frá ef þið eruð að íhuga þátttöku!

Fyrra árið í þjálfun
Á fyrra ári (12 mánuðir) er lögð áhersla á að nýliðar öðlist þann þekkingargrunn sem nauðsynlegur er svo þeir geti verið sjálfbjarga og tryggt eigið öryggi í æfingum og aðgerðum. Námskeið sem eru kennd á þessu ári eru meðal annarra:

• Ferðamennska og rötun
• Fyrsta hjálp
• Ferðast á jökli
• Grunnatriði í snjóflóðum
• Fjallamennska
• Jöklaganga
• Veðurfræði til fjalla
• Spottamál
• Klifur og sig

Auk þess er farið í fjölda ferða; tjaldferðir í vetraraðstæðum, gönguskíða- og snjóhúsaferð og fleira. Nýliðar þurfa að vera virkir í að þjálfa sig og æfa utan formlegrar dagskrár.

Seinna árið í þjálfun
Á seinna árinu (u.þ.b. 8 mánuðir) er lögð á áhersla á fræðslu og þjálfun í því sem tengist beint þátttöku í æfingum og aðgerðum og má þar telja leitartækni og framhald í fyrstu hjálp. Þá fá væntanlegir félagar tækifæri til þess að sérhæfa sig á þeim sviðum sem þeir hafa sérstakan áhuga á. Geta þeir þar valið um námskeið í fjallamennsku, ísklifri, fyrstu hjálp, rústabjörgun og mörgu öðru. Á þessu tímabili taka félagar virkan þátt í starfi hópa HSSR og kynnast sveitinni þannig með beinum og virkum hætti.

Áfram er farið út fyrir borgarmörkin og ferðast í styttri og lengri ferðum. Nýliðar eru áfram virkir í að þjálfa sig og æfa utan formlegrar dagskrár.

Fullgilding nýliða
Flestir félagar ganga inn í sveitina 20 mánuðum eftir að þeir hefja nýliðaþjálfun sína. Fullgilding nýliða er háð því að nýliðar taki ákveðin grunnnámskeið sem allir þurfa að fara í gegnum ásamt því að hafa mætt í þær ferðir sem til er ætlast og sýnt virkni í starfi.

Fjáraflanir
Starf HSSR, sem og allra annarra björgunarsveita hérlendis, er háð fjáröflunum. Rík áhersla er því lögð á að væntanlegir félagar í sveitinni taki þátt í því starfi og kynnist mismunandi fjáröflunum. Á síðustu árum hefur HSSR meðal annars selt flugelda, selt Neyðarkall, sinnt viðhaldi á gönguleiðum á Hengilssvæðinu, sinnt gæslu á kappleikjum á Laugardalsvelli, sett saman og skotið upp flugeldasýningum auk annarra verkefna sem sveitin er beðin um að annast.

Hafir þú spurningar sem ekki er svarað hér getur þú sent okkur póst á hssr@hssr.is.

Umsókn um þjálfun sem nýliði í HSSR.