Danni og Brynjar ganga frá öllum spottum áður en sá síðarnefndi sígur niður til Bjarka sem þurfti að bjarga
Samæfing í fjallabjörgun
Category Archives: Fréttir
Páskaferð á Snæfellsjökul
Almenn páskaferð HSSR þetta árið var skíða- og gönguferð á Snæfellsjökul. Dagurinn vandlega valinn skírdagur, þannig að skyggni yrði ekkert og ekkert nema helvítis rok á fjallinu! Það var reyndar meinleysisveður þegar lagt var af stað en það hvessti eftir því sem ofar dró. Fréttum frá vélsleðamönnum á keiðinni að aðstæður vera afleitar eða hefðu í öllu fallið verið það daginn áður. Jökullinn eitt klakastykki og erfiður yfirferðar. Ekki neitt harðfenni heldur bara klaki. Það hafði hins vegar snjóað eitthvað þannig að klakinn var ekki til trafala til að byrja með.
Hópurinn hafði auðvitað ekki neinn sérstakan áhuga á því að elta snjóbílasóð og fóru sínar eigin leiðir áleiðs upp. Þar var boðið upp á góðan hliðarhalla og á köflum einhverja snjóflóðahættu en samt allt innan marka. Það hvessti alltaf meira og meira og varð svo að lokum skítkalt. Klakinn var hins vegar næstum alla leið upp hulinn góðu snjólagi sem hafði komið líklega nóttina áður. Það brást svo rétt fyrir neðan þúfurnar og varð það til þess að snúið var við. Þetta átti víst eftir allt saman mestmegnis að vera skemmtiferð en ekki bara æfing í að ganga á skíðum eða ekki skíðum upp brekku í vondu veðri án þess að sjá nokkurn skapaðan hlut. En jú, þetta endaði á að vera hvort tveggja!
Niðurferðin gekk að sjálfsögðu bara vel og var skíðað af kappi. Hópurinn var haldinn á jöklinum en svo var bara skíðað eða ekki skíðað eftir getu hvers og eins. Margir voru á fjallaskíðum og kunnu með þau að fara. Það var loks hressa liðið sem skildi eldra og lélegra skíðaliðið eftir. Svo voru aðrir eins og undirritaður sem hafði ekki stigið á svigskíði í heilt ár og var einhvern veginn á dularfullan hátt kominn í plógskíðabeygjustílinn! Aðrir voru á gönguskíðum og var hver með sinn stíl en skinnastíllinn var vinsæll í efri hluta fjallsins þar sem brattinn var meiri. Nú og svo mátti líka alveg vera gangandi þarna líka. Sem sagt allt leyfilegt á fjöllum!
Vordagsferð Fjallahóps 2013
Kátur hópur.
Fjórir vaskir félagar Fjallahóps, Charlotte, Ívar, Tinni og Tommi auk Hersis, hunds Tomma, héldu á Tröllakirkju í Kolbeinsstaðarfjalli á sunnudaginn. Spáin var sérdeilis góð og kappar því fullir tilhlökkunar enda lýsingarnar af útsýninu ofan af þessum tindi ákaflega heillandi.
Lagt var upp frá bænum Mýrdal inn af Kolbeinsstöðum. Ferðalangar höfðu útvegað sér feril en völdu sér leið nokkru sunnar, eftir dragi í stað þess að fylgja gilinu. Heildarhækkunin kemur í tveimur hlutum en þegar upp hinn fyrra er komið tekur við nokkur flati upp að Kirkjunni sjálfri.
Þegar upp á fyrri brúnina var komið blasti Tröllakirkjan við og virtist vænlegast að halda upp snjólínu eina í greinilegu gili, sunnanmegin í klettunum. Þegar nær dróg seinni hlutanum kom í ljós að þeir voru ekkert svo brattir og því ákveðið að leita að leið í gegnum hamrana.
Sveitarfundur HSSR 2013
Sveitarfundurinn var haldinn nú í kvöld og mæting góð enda hefð fyrir því að þar gangi inn stór hópur þeirra nýliða sem lokið hefur sínu öðru ári í nýliðaþjálfuninni og býður að því tilefni upp á myndarlegar kræsingar.
Að þessu sinni skrifaði undir eiðstafinn föngulegur fimmtán manna hópur; sjö karlar og átta konur. Búast má við að þau bætist á útkallsskrá á næstunni. Er sveitinni mikill sómi af þessu duglega fólki.
Nýliðarnir sem skrifuðu undir eiðstafinn ásamt félögum þeirra sem ganga inn á næstu mánuðum.
Meðal annarra dagskrárliða voru kynning á siðareglum sveitarinnar og afhjúpun eiðstafsins sem nú prýðir vegginn mót bækisstöðinni þegar komið er upp stigann á aðra hæð, Kristjón kynnti stöðu vefmála og Einar Ragnar reynsluna af sveitaræfingunum.
Að veislu veitinga lokinni var Birgir Blöndahl með stutta tölu og myndasýningu frá nýlegu námskeiði sem hann sótti í Chile í vetur.
HSSR tekur þátt í Mottumars
Nokkrir vel skeggjaðir félagar í Hjálparsveit skáta í Reykjavík taka þátt í Mottumars í ár og biðla til áhugasamra um að leggja sér lið til þess að sem mest fé geti safnast. Eins og allir vita er Mottumars haldinn árlega til þess að vekja sérstaka athygli á krabbameini í körlum og safna fé til rannsókna á þessum vágesti.
Árlega greinast að meðaltali 725 karlar með krabbamein á Íslandi og árlega deyja að meðaltali um 287 karlar úr krabbameinum. Þetta eru synir, makar, bræður, pabbar, afar og vinir. Þitt framlag skiptir miklu máli. Við getum haft áhrif því rannsóknir sýna að koma má í veg fyrir að minnsta kosti 1 af 3 krabbameinum með t.a.m. fræðslu og forvörnum. Heimsæktu því HSSR á vef Mottumars og leggðu góðu málefni lið!
Fjallamennska 2
Tveir hópar rétt undir hryggnum stuttu fyrir niðurferð.
Nú um helgina hélt vaskur hópur nýliða ásamt undanförum og undanrennum upp í Skarðsheiði að nema fjallamennskufræði. Lagt var af stað af Malarhöfðanum rétt fyrir dagrenningu á laugardeginum.
Stefnan var á skálina vestan við Skessuhorn og fann hópurinn ákjósanlegt tjaldstæði við Katlana rétt undir Horninu. Þar var slegið upp tjaldbúðum og svo haldið í ísaxarbremsuæfingar og broddagöngu. Aðstæður voru með besta móti; gott veður og glerhart hjarn.
Allir hópar voru svo komnir aftur niður rétt fyrir sólsetur. Fólk kom sér fyrir í tjöldum sínum, eldaði kvöldmat og hélt sátt og satt í háttinn eftir langan dag.
Sveitarfundur HSSR þriðjudaginn 19. mars
Sveitarfundur HSSR verður haldinn þriðjudaginn 19. mars næstkomandi Malarhöfða 6. Fundurinn hefst klukkan 20:00 og eru allir félagar hvattir til að mæta.
Dagskrá fundarins er:
- Útkallsmál, mæting og uppbygging útkallslista
- Skýrsla stjórnar
- Peningamál sveitarinnar
- Dagskrá og stefnan í henni næsta árið
- Ný heimasíða sveitarinnar
- Siðareglur HSSR
- Innganga nýrra félaga
- Birgir Blöndahl verður með kynningu á ferð sinni suður um höf
N2 munu sjá fyrir glæsilegum veitingum í hléi!
Stjórn hvetur alla félaga sem nýliða til að fjölmenna á fundinn!
Isavia styrkir hjálparsveitir
Félagar í HSSR taka á móti styrk frá ISAVIA.
Á nýliðnu ári veitti stjórn ISAVIA nokkrum hjálparsveitum fjárstyrk til að efla viðbragð sveitanna í hópslysum, þar á meðal í flugslysum. Síðastliðinn föstudag bauð ISAVIA þremur sveitum af höfuðborgarsvæðinu í móttöku þar sem fjárveitingin og tilgangur hennar var kynnt.
Hjálparsveit skáta nýtti styrkinn til kaupa á fjórum stórum töskum til að sameina allan neyðarbúnað sveitarinnar á einn stað í hverju farartæki. Jafnframt var innihald þeirra endurnýjað og er þar nú að finna m.a. bráðaflokkunartösku, nýja súrefniskúta, blóðþrýstingsmæla, reykbombur og neyðarblys og fjölmargt fleira, sjá einnig frétt frá maí 2012. Töskurnar eru handhægar og má með örfáum handtökum breyta þeim í bakpoka. Auðvelt er að grípa sjúkrabúnaðinn með sér, að hluta eða í heild. Einnig sýndi sveitin áfyllingartöskur sem voru keyptar. Þar er á einum stað búnaður til að fylla á sjúkratöskur björgunarmanna en hratt getur gengið á birgðir í litlum sjúkratöskum þeirra ef sinna þarf mörgum slösuðum.
Almannavarnir í nútíð og fortíð
Víðir Reynisson, deildarstjóri almannavarnadaeildar ríkislöglustjóra.
Varðberg hefur beðið Víði Reynisson, deildarstjóra almannavarnadeildar ríkislögreglustjóra, að flytja erindi fyrir Varðberg í fyrirlestrasal Þjóðminjasafns Íslands fimmtudaginn 31. janúar klukkan 12.00 til 13.00. Hann mun ræða um almannavarnir í nútíð, nýjar áskoranir og öryggi almennings. Undanfarin ár hefur reynt á almannavarnakerfið vegna náttúruhamfara. Óveður í haust og í vetur eru nýjustu dæmin um hvernig kerfið er virkjað til að tryggja öryggi almennings. Þetta mikilvæga öryggiskerfi alls almennings er í sífelldri þróun og mótun.
Samhæfingar- og stjórnstöð almannavarna í Skógarhlíð er virkjuð þegar nauðsyn krefst að mati þeirra sem koma að stjórn leitar og björgunar eða viðbragða við hættuástandi. Liður í öflugum almannavörnum er miðlun upplýsinga um hlutverk þeirra og eðli. Víðir gekk í Hjálparsveit skáta í Reykjavík árið 1986 og hefur síðan tekið þátt í fjölmörgum aðgerðum í þágu almannaöryggis, þar á meðal umfangsmiklum björgunaraðgerðum eins og snjóflóðunum árið 1995. Upphaflega var hann almennur félagi, síðar stjórnandi hópa og að lokum þátttakandi í svæðisstjórn. Árið 2000 hóf Víðir störf hjá Almannavörnum ríkisins og varð starfsmaður við embætti ríkislögreglustjóra þegar málefni almannavarna voru flutt þangað árið 2003. Hann lauk prófi frá lögregluskóla ríkisins árið 2006 og tók í árslok við sem deildarstjóri almannavarnadeildar ríkislögreglustjóra. Hann hefur sem yfirmaður samhæfingarstöðvar almannavarna leitt samhæfingu milli viðbragðsaðila, opinberra stofnana og ráðuneyta.
Allir áhugasamir velkomnir.
Æfingu Alþjóðasveitarinnar í Danmörku að ljúka
Félagar í ÍA við störf sín í æfingunni MODEX 2013 sem haldin var í Danmörku í janúar 2013.
Æfingu Alþjóðasveitarinnar í Danmörku er nú að ljúka. Sveitin er komin í sk. ‘stand-down’ stöðu og meðlimir byrjaðir að týna saman búnað, þurrka verkfæri og skipuleggja heimför.
Æfingin hefur gengið vel síðasta sólarhringinn. Reynt hefur á marga mismunandi þætti eins og viðbrögð við slysi á björgunarmanni, samstarfi við tékkneska vettvangs spítalann og þátttöku í verkefnum með bresku sveitinni. Sveitin sinnti í dag fjórum mismunandi verkefnum í einu þ.e. leit í rústum, leit að flugvél sem hrapaði, hundaleit og mat á tjóni á öðrum vettvangi. Þannig hafa t.d. björgunarmenn, stjórnendur, fjarskiptafólk og OSOCC hópur fengið margvíslega þjálfun við fjölbreytt verkefni og mikla samhæfingu við marga aðila. Allt er þetta gert undir vökulum augum eftirlitsaðila frá Evrópusambandinu og þjálfara frá æfingastjórn. Þessir aðilar koma reglulega til að fylgjast með og spyrja fólk hvaða ákvarðanir hafa verið teknar og af hverju. Þetta hjálpar okkur til að skoða gagnrýnið okkar störf og meta hvað við erum að gera vel og hvað mætti bæta.
Það hefur hlýnað töluvert, nú komið upp fyrir frostmark, svo að fólk er slakara en búðirnar eru að breytast í drullusvað þannig að hitinn hefur sína kosti og galla. Búðahópur hefur venju samkvæmt framreitt dýrindis mat þannig að sveitin er vel haldin. Svo er það bara heimferðardagur á morgun en búðahópur er er væntanlegur á þriðjudag.