Category Archives: Tilkynningar

Tilkynningar til félaga.

Fyrirlestraröð á leitartæknisviði

Fyrirlestrakvöld leitartæknihópa á svæði 1

Í kvöld verður haldin fyrirlestraröð um málefni sem snerta leitartækni í húsnæði HSSR að Malarhöfða 6 og hefst dagskráin kl. 19. Á dagskrá eru fimm erindi:

  • Almennar ábendingar frá tæknideild RLS
  • Hagnýt notkun dróna í björgunarstörfum
  • Notkun snjalltækja í aðgerðum
  • Leitarhundar
  • Almennt um leitartæknimál

Allir félagar á svæði 1 eru velkomnir hvort sem er fullgildir eða nýliðar.

Vinir HSSR, stofnfundur

Stjórn Hjálparsveitar skáta í Reykjavík
boðar til fundar miðvikudaginn 17. sept. n.k. kl 20:00,
sem haldinn verður í húsnæði sveitarinnar að Malarhöfða 6.

Tilefni fundarins er stofnun:

Vina HSSR
(Hollvinasamtaka Hjálparsveitar skáta í Reykjavík)

Vorið 2013 ákvað stjórn HSSR að hefja vinnu sem miðaði að því að ná saman á einn stað nöfnum sem flestra aðila sem einhvern tíma hafa starfað innan vébanda HSSR.

Stjórn sveitarinnar vill með þessu endurnýja sambandið við gamla félaga sveitarinnar og stuðla að endurnýjuðum kynnum þeirra með það að markmiði að úr geti orðið einhverskonar samtök eða hópur eldri félaga sem getur stutt við starfsemi HSSR með margvíslegu móti.

Til að koma þessari vinnu af stað voru fengnir þrír ‘gamlir’ félagar HSSR, þeir Benedikt Þ. Gröndal, Laufey Gissurardóttir og Eggert Lárusson, sem ásamt ýmsum öðrum félögum HSSR hafa unnið að undirbúningi málsins.

Undirbúningsnefndin hefur unnið talsvert starf við að afla upplýsinga í eldri félagaskrám sveitarinnar. Nú er búið að ná saman milli 600-700 nöfnum eldri félaga. Þar af er um helmingur þeirra enn skráður á félagalista HSSR. Stefnt er að því að ná til sem flestra eins og kostur er.

Fyrst um sinn hefur verið miðað við að ná til þeirra sem hafa undirritað eiðstaf sveitarinnar, en sá siður hefur verið viðhafður frá árinu 1966.

Fyrir þann tíma eða milli 1962 þegar sveitin var endurreist og 1966 voru m.a. svokallaðir boðunarflokkar hinna 8 deilda Skátafélags Reykjavíkur. En ýmsir sem þar störfuðu undirrituðu eiðstafinn eftir 1966, en aðrir gerðu það ekki af ýmsum ástæðum. Hugmyndin er að ná til þessa hóps síðar, sem og þeirra sem störfuðu í sveitinni fyrir 1962.

Stefnt er að því að samtökin verði málefnamiðuð sem taki að sér ýmiskonar vinnu við málefni sem hinir starfandi félagar eru ekki að sinna, en koma starfsemi HSSR til góða.

Stjórn HSSR skipar samtökunum stjórn fyrsta starfsárið, en síðan verður kosin stjórn á næsta aðalfundi samtakanna. Stjórnin verði ábyrg gagnvart stjórn HSSR og gefur henni stutta skýrslu um starfsemi samtakanna í lok hvers starfsárs.

Undirbúningshópurinn telur, að það sé líklegt til árangurs að stofnaðir verði vinnuhópar eða flokkar um hvert málefni og að hver hópur velji sér talsmann eða foringja. Heppilegur fjöldi í hverjum hóp er 5-8 félagar. Talsmenn/foringjar hvers verkefnishóps gefa stjórn hollvinasamtakanna skýrslu í lok árs.

Undirbúningshópurinn telur áríðandi að halda væntanlegri starfsemi eins einfaldri og mögulegt er, en fyrst og fremst að hafa gaman af og reyna eftir megni að endurupplifa ‘ævintýrið’ að vera félagi í hjáparsveit og gera í leiðinni ‘gömlu sveitinni’ sinni eitthvert gagn.

Undirbúningshópurinn telur að það séu í raun fá takmörk fyrir því hverskonar verkefni eða málefni svona samtök gætu unnið að, svo fremi að þau styrki starfsemi HSSR og þá um leið þjóðfélagsins alls.

Það er ekki ætlunin að samtökin hlutist í mál og verk sem starfandi félagar sinna. Þó eingöngu ef stjórn sveitarinnar eða tilteknir hópar innan HSSR óska eftir aðstoð samtakanna við tiltekin mál.

Meðal þeirra mála sem samtökin gætu unnið að er t.d.:

  • Viðhald húsnæðis, lóðar eða eigna HSSR.
  • Skrásetning sögu HSSR og æviatriða einstaklinga tengdum HSSR.
  • Minjasöfnun, varsla og skrásetning muna HSSR.
  • Söfnun og skrásetning mynda úr starfi HSSR.
  • Undirbúningur og umsjón fræðslufunda um málefni HSSR fyrir ‘Vini HSSR’.
  • Öflun nýrra styrktaraðila fyrir HSSR.
  • Umsjón með fræðslu- og skemmtiferðum fyrir ‘Vini HSSR’.
  • Þátttaka í ýmsum fjáröflunum fyrir HSSR.
  • Undirbúningur og umsjón með t.d. reglulegu kaffi eða ‘brunch’ fyrir eldri félaga.
  • Önnur málefni sem tengjast starfi HSSR.

Stjórn Hjálparsveitar skáta í Reykjavík bíður alla eldri félaga sveitarinnar velkomna á fundinum, og vonar að þeir geti átt gott samstarf með gömlum og nýjum félögum innan HSSR, en á fundinum verður boðið upp á veitingar.

Merki HSSR

Ný stjórn HSSR fyrir starfsárið 2013-14

Á aðalfundi HSSR, sem haldinn var 12. nóvember, var ný stjórn sveitarinnar fyrir starfsárið 2013-14 kosin og skipa hana því eftirtaldir einstaklingar næsta árið:

  • Haukur Harðarson, sveitarforingi
  • Daníel Másson
  • Einar Ragnar Sigurðsson
  • Melkorka Jónsdóttir
  • Sigþóra Ósk Þórhallsdóttir
  • Tómas Gíslason
  • Þorbjörg Hólmgeirsdóttir

Félagar í HSSR óska stjórnarfólki velfarnaðar í starfi.

Framboð fyrir aðalfund HSSR

Uppstillingarnefnd HSSR óskar hér með eftir tilnefningum til stjórnar HSSR. Tekið er við ábendingum frá öllum félögum en bent er á að aðeins fullgildir félagar geta boðið sig fram til stjórnarsetu.

Við minnum á að hlutverk uppstillingarnefndar er að sjá til þess að á aðalfundi séu komin framboð í öll laus sæti í stjórn og öðrum embættum sem kjósa skal í. Jafnframt minnum við á að hægt er að tilkynna um framboð, allt fram að kosningu á aðalfundi sem fer fram í nóvember.

Tölvupóstfang uppstillingarnefndar er uppstilling@hssr.is og þar er tekið við öllum tillögum að framboðum og öðrum hugrenningum ágætra félaga HSSR.

Bestu kveðjur frá uppstillingarnefnd HSSR,
Hálfdán, Helga og Helgi.

Sveitarfundur 24. september

Þann 24. september næstkomandi verður haldinn sveitarfundur HSSR á Malarhöfða 6.

Fundurinn hefst kl. 20.00 og eru allir félagar hvattir til að mæta. Þetta er tilvalið tækifæri fyrir þá nýliða sem voru að hefja starf að fá innsýn í starf HSSR

Á fundinum verður meðal annars kynnt skýrsla stjórnar, farið yfir hópaskipulag, breytingar í nýliðaþjálfun, dagskrá sveitarinnar og viðburðir á næstunni, farið yfir styrki til námskeiða, áætlun útkallshópa næsta veturs og loks verður kynning frá félaga í sveitinni.

Stjórn hvetur alla félaga að fjölmenna!

Umsóknarfrestur og fyrsta námskeið nýliða

RötunNæstkomandi miðvikudag, 11. september kl. 20 að Malarhöfða 6, verður fyrsta viðburðurinn í þjálfun nýrra nýliða. Það er undirbúningur fyrir námskeiðið Ferðamennska og rötun og verður farið yfir pökkun í bakpoka og önnur nauðsynleg þekkingaratriði. Við minnum á að umsóknarfrestur rennur út að kvöldi þess sama dags. Umsóknum er skilað rafrænt og er slóðin bit.ly/hssr-umsokn-2013.

Um næstu helgi, 13.-15. september, verður fyrsti stóri viðburðurinn fyrir nýliða 2013-15 haldinn, en það er helgarnámskeiðið Ferðamennska og rötun sem haldið verður við Úlfljótsvatn. Þetta er mikilvægt grunnnámskeið sem liggur til grundvallar flestu því sem gerist eftirleiðis í þjálfuninni þannig að áríðandi er að nýliðar mæti þar.

Bæklingur til kynningar nýliðaþjálfun 2013-15 er hér issuu.com/hssr/docs/nylidakynning-2013. Sé frekari upplýsinga þörf er hægt að senda nýliðaforingjum póst á netfangið hssr.nylidar.2013@gmail.com.

Við vonumst til þess að sjá sem flesta í sterkum og öflugum hópi nýliða.

Kynningarferð nýliða á Helgafell 5. september

Í góða veðrinu í dag, fimmtudag 5. september, verður farin kynningargönguferð á Helgafell.  Þar mæta bæði félagar í HSSR og nýliðar sem eru að hugsa um að hefja þjálfun í haust.  Þægilegur göngutúr þar sem nýliðar byrja að kynnast hver öðrum og einnig félögum í sveitinni.

Mæting á Malarhöfða 6 og brottför kl. 18:00.  Farið á bílum HSSR og einkabílum ef þörf er á.

Fyrsta námskeið nýliða hefst síðan miðvikudagskvöld 11. september og þá rennur einnig umsóknarfrestur út.  Umsóknarformið er hér.

Kynningarbæklingur er hér.

Kynning á nýliðaþjálfun HSSR

Kynningarbæklingur 2013Hjálparsveit skáta í Reykjavík mun halda kynningu á nýliðaþjálfun sveitarinnar nk. þriðjudag 3. september kl. 20 að Malarhöfða 6. Þar verður farið vel yfir alla þætti nýliðastarfsins í máli og myndum og geta gestir fengið þar svör við öllum spurningum sem upp kunna að koma í tengslum við málefnið. Allir sem hafa áhuga á því að kanna hvort nýliðaþjálfun í björgunarsveiti henti þeim eru hvattir til þess að mæta og kynna sér málið.

Kominn er út bæklingur sem inniheldur margvíslegan fróðleik um nýliðastarfið og er hægt að nálgast hann hér.

Hægt er að fylla út umsókn hér: bit.ly/hssr-umsokn-2013. Frekari upplýsingar má fá með pósti á netfangið hssr.nylidar.2013@gmail.com.

Viðbót 4. september kl. 21:20: Fimmtudaginn 5. september verður farið í létta göngu á Helgafell í Hafnarfirði. Væntanlegir nýliðar geta annað tveggja mætt kl. 17:45 á Malarhöfða 6, en þaðan verður lagt af stað með rútu kl. 18 eða mætt beint á bílaplanið við Helgafell, en lagt verður af stað þaðan kl. 18:30. Við vonumst til þess að sjá sem flesta, veður verður með besta móti þannig að þetta verður hin besta skemmtun!

Vilt þú verða nýliðaforingi?

Auglýst er eftir áhugasömum félögum til að taka að sér umsjón með nýliðum sem hefja þjálfun næsta haust.  Leitað er að tveimur félögum sem:

  • Hafa starfað með sveitinni sem fullgildir félagar í a.m.k. 2 ár
  • Eru vel tengdir innan sveitarinnar og hafa reynslu af sem flestum þáttum í starfinu
  • Eiga gott með að vinna með alls konar fólki
  • Eru reiðubúnir að sjá um nýliðastarf þangað til nýliðarnir ganga inn í sveitina árið 2015
  • Eru gjarnan af sitt hvoru kyninu

Einstaklingar geta sótt um en svo er líka hægt að sækja um tvær, tveir eða helst tvö saman.  Þeir sem hafa áhuga sendi upplýsingar til Einars Ragnars á netfangið eragnarsig@gmail.com fyrir næsta stjórnarfund sem er þriðudag 16. apríl kl. 18. en þá verða umsóknir skoðaðar.

– Stórn HSSR

Gönguskíði

Eftirfarandi er gönguskíðadagskrá HSSR fyrstu vikuna í febrúar:

  • Fimmtudagur 7. febrúar kl. 18, æfingaferð (líklega í Bláfjöllum).
  • Laugardagur 9. febrúar, dagsferð á skíðum.

Eftirbátar munu sjá um æfingar og kennslu.

Í Bláfjöllum verður hægt að fá leigð skíði fyrir þá sem ekki eiga og einhver ráð verða með að bjarga skíðum skíðalausum í dagsferðinni einnig.

Skráning er í D4H.