Mynd tekin á flugi yfir Vatnjökli í morgun á vegum Jarðvísindastofnunar og Flugmálastjórnar – ekki amalegar skíðabrekkur og klifurlegir tindar!

—————-
Texti m. mynd: ljósmynd: Björn Oddsson
Höfundur: Hrafnhildur Hannesdóttir

Ég var svo heppin að hann Smári Sig varaformaður SL og félagi í Súlum bauð mér norður á sleða s.l. miðvikudag. Farið var í Fjörður og Flateyjardal og m.a. kíkt á neyðarskýli í Þorgeirsfirði. Allt var á kaf í snjó og veðrið gat ekki verið betra. Þessir fjallasalir eru magnaðir og mikið var gaman að geta ekið á vélasleða alveg niður í flæðarmál á þessum árstíma. Vonandi hef ég tækifæri á að fara fljótlega aftur á þessar slóðir því nóg er að skoða. Hér eru nokkrar myndir úr túrnum sem ég tók undir möppunni „Enn nægur snjór“
http://web.mac.com/s.sigurdsson

—————-
Texti m. mynd: Hvalvatnsfjörður
Höfundur: Kristinn Ólafsson

Palli og Gunni nýttu góðviðrið og áttu góðan dag að Fjallabaki ásamt nokkrum félögum Gunna. Night ride í Glaðheima, hádegismatur á Ými, kaffi á Heklu og heim í kvöldmat. 206 km dagur. Myndir í myndaalbúmi.

—————-
Texti m. mynd: Á Ými, Hekla í baksýn
Höfundur: Páll Ágúst Ásgeirsson

Það voru 10 núverandi og fyrrverandi nýliðar sem voru við klifur, fjall- og jeppamennsku í Þórsmörk helgina 12 – 13 apríl. Auðvitað frábær ferð. Sumir voru að ísklifra bæði þurrt og blautt í Stakkholtsgjá og aðrir skoppuðu upp á Útigönguhöfða. Hægt að skoða myndir á Flickr og sem slideshow líka.

—————-
Texti m. mynd: Ísklifrað í Stakkholtsgjá
Höfundur: Einar Ragnar Sigurðsson

Nú nýverið klifruðu tveir félagar úr Undanfaraflokki HSSR, þeir Robbi og Siggi Tommi, þrjá norðurveggi á Skarðsheiði samdægurs. Þessi leikur hefur aðeins einu sinni verið leikin áður, þann 27. mars 1993 og þá af þeim Páli Sveinssyni undanfara úr HSSR og Guðmundi Helga Christensen undanfara úr FBSR.
Til að gera söguna styttri vil ég benda áhugasömum á umræðuvef ÍSALP:
http://isalp.is/forum.php?op=p&t=1572
og myndasíðu Robba: http://picasaweb.google.com/roberthalldorsson/HeiArhornSkarShornOgSkessuhorn
Þetta er bara of flott til að láta það fram hjá sér fara.

Til hamingju strákar með flottan leiðangur.

—————-
Höfundur: Hlynur Skagfjörð Pálsson

Hluti sleðaflokks brá undir sig betri fætinum (og sleðanum) eftir vinnu á mánudegi og fór í heimsókn til Eiríks Karlssonar í Eskimóa í Stíflisdal. Eiríkur var að klára 20 km skíðagöngu þegar við mættum í hlað Gunnar, Páll , Hlynur og Kristinn. Karlinn var orðinn vel heitur og tilbúinn að sýna okkur bakgarðinn sinn í góðviðrinu.

Ekið var á Botnssúlur með viðkomu á Selfjalli. Þaðan var haldið austur fyrir Kvígindisfell og stefnan tekin á Tjaldafell. Ekki var stoppað lengi í Tjaldafelli heldur tekin stefnan á Þórisjökul. Útsýnið var frábært og sólin að setjast bak við Ok. Eftir harðfisk og myndatöku á toppi Þórisjökul var haldið niður í Þórisdal og stefnan tekin aftur í Botnssúlur um Kaldadal. Í rökkrinu var ekið í Eskimóa þar sem var boðið upp á kaffi og köku. 130 kílómetrar að baki undir traustri fararstjórn jarlsins á Eskimóa.

Við þökkum kærlega fyrir okkur.

Myndir á myndasíðu.

—————-
Texti m. mynd: Kræsingar í Eskimóa
Höfundur: Páll Ágúst Ásgeirsson

Gömlu brýnin í Eftirbátum fóru sína árlegu gönguskíða vorferð um síðustu helgi. Líkt og oft áður var haldið norður fyrir heiðar. Lagt var í’ann kl. 7 á föstudagsmorgun á Woffanum og var stefnan tekin á innsta bæ í Eyjafirði, þar sem gangan hófst. Í brekkunni við Þverárrétt í Öxnadal ókum við fram á bílveltu þar sem Jón Baldursson stjórnaði af mikilli festu og kallaði til þrjá sjúkrabíla enda 8 farþegar í bílnum sem valt. Allt endaði vel og hópurinn náði að gæða sér á dýrindis bakkelsi í bakaríinu við brúna áður en lengra var haldið.

Gengið var upp Vatnahjallann, austan við Sankti Pétur og komið í hinn margrómaða fjallaskála Bergland kl 20:30. Fía reiddi síðan fram dýrindis kvöldmáltíð fyrir þreytta ferðafélaga.

Á laugardeginum var gengið í Austurdal um Fremri Hvítárdal sem eru drög sem teygja sig hálfa leið að Berglandi. Snjórinn var annað hvort í ökkla eða eyra þar sem mjög snjólétt var í drögunum að frátöldum nokkrum stórum snjóflóðum sem við klöngruðumst yfir. Ekki fór heldur mikið fyrir snjónum í Austurdal en með þrautsegju fundust einhver snjókorn á reiðveginum. Hópurinn var mis þrjóskur enda margir þrjótar á ferð. Sumir þrjóskir þrjótar gengu á skíðunum nær sleitulaust í Hildarsel sem er skáli í Austurdal í eigu Ferðafélags Skagfirðinga.

Á sunnudeginum voru gengnir 600 metrar á skíðum og tæpir 9 kílómetrar með skíðin á bakinu. Eftirbátar eru að hugsa um í framtíðinni að skella sumar- og vetrarferð saman í eina ferð, eftir þessa reynslu.
Félagar í Flugbjörgunarsveitinni í Varmahlíð tóku síðan á móti hópnum við kláfinn við Skatastaði.

Ferðin var talsvert ævintýri enda fengum við að heyra það hjá húsfreyjunni á Bústöðum að hún vissi aðeins um einn annan hóp, í gegnum árin, sem hefði gengið á skíðum yfir Nýjabæjarfjall.

Eftir á að hyggja þarf að vanda leiðaval verulega með tilliti til snjóflóða þar sem miklar hengjur safnast í drögin á þessum slóðum.

Myndir er að finna á http://www.flickr.com/photos/hilmarmar

Eftirbátar

—————-
Texti m. mynd: Á leið í Bergland í kvöldsólinni.
Höfundur: Hlynur Skagfjörð Pálsson

Sælir félagar.

Ég tók smá renning með Félögum okkar úr FBSR um helgina. Fórum víða um fjallabaksvæðið. Tókum af neðan við brúna við Vatnsfell. Byrjuðum á því að gista á laugardagskvöldið í Jökulheimum með Heldri Fjallamönnum (Alla Ingimars,Valda rakara, Gunna Egils, Gunna Antons, Garðari Briem og fleirum)
Á sunnudagsmorgni var farið yfir í Langasjó, Breiðbak, niður að Sveinstindi og tekið kaffi í skálanum þar. (einn af skemmtilegri fjallaskálum á þessu svæði og vannýttur á veturnar) Þaðan var rennt niður að Tungnaá eftir öllum giljum á svæðinu. Æfðum okkur aðeins í að taka snjóflóðagryfjur og tókum smá ýla æfingu. ÞAÐ ER MIKIL FLÓÐA HÆTTA á þessu svæði. Fórum eftir Tungnaá niður í Glaðheima, inn í Laugar og svo aftur til baka upp í Veiðivötn þar sem að við tókum smá kaffi og athuguðum með húsið okkar. Þaðan var tekin stefnan niður í Vatnsfell.
Hér kemur líka linkur inn á myndir sem að G. Arnar FBSR tók um helgina

http://picasaweb.google.com/gudmundur.arnar

kv Björninn

—————-
Texti m. mynd: Ég er svalur.
Höfundur: Hlynur Skagfjörð Pálsson

Tveir HSSR-liðar lögðust í víking í síðasta mánuði og herjuðu á frændur vora í Noregi. Tímanum var að stærstum hluta varið á Svalbarða þar sem numin voru ýmis fræði tengd jöklum og veðri og toppatúrar stundaðir grimmt. Að auki voru viðbrögð við kali æfð, en hitastigið varð lægst nærri -50°C. Bangsímon lét ekki sjá sig en hreindýr og tófur þeim mun oftar. Glaðst og grátið var yfir sigrum og hrakförum Jesús Jósepssonar með páskaskíðun í Suður-Noregi, jafnt innan brautar sem utan. Nokkrar myndir á heimasíðunni.

Hrafnhildur og Hálfdán

—————-
Texti m. mynd: á toppi Nordenskiöld einn góðviðrisdag
Höfundur: Hrafnhildur Hannesdóttir

Stjórnarlimurinn og undanfarinn Steppo skrapp til Kyrgyzstan í þyrluskíðaferð. Með í för voru mið-gömlu brýnin og risaeðlurnar Hallgrímur Magnússon og Tómas Júlíusson. Ferðast var dagana 14. – 24. febrúar, með viðkomu í kóngsins Köbenhavn og Moskvu.

Var það mál mann að þetta væri fyrirtaks leiksvæði og aldrei að vita nema að farin verður sveitarferð þangað síðar meir! Ekki skemmdi heldur fyrir að knæpur og söfn höfuðborgarinnar, Bishkek, voru fyrirtaks skemmtun þegar ekki gaf á fjöllin.

Myndasýning og myndband vonandi fyrr heldur en síðar!

—————-
Vefslóð: ak-sai.com
Texti m. mynd: Mið-gömlu brýnin og fararskjótinn góði.
Höfundur: Stefán Örn Kristjánsson