Undanfarar- og rennur héldu til fjalla eldsnemma á sunnudagsmorgun í von um að ná á tind Heklu í spáðu blíðskaparveðri. Færið á Dómadalsleið var sæmilegt, laus snjór sem þjappaðist illa, en bláu bílarnir tveir komust klakklaust að Skjólkvíahrauni rétt fyrir morgunkaffi. Örkuðum við af stað á þelamerkurskíðunum í átt að eldfjallinu, en brátt varð okkur ljóst að tindinum myndum við seint ná, þar sem skýjaslæða huldi efri hluta fjallsins allan daginn. Þremenningarnir skíðuðu nokkrar vel valdar brekkur og nutu fríska fjallaloftsins út í ystu æsar.

ferðanefndin

—————-
Höfundur: Hrafnhildur Hannesdóttir

Fyrsti fasi skíðaferðarinnar til Akureyrar hófst að loknum vinnudegi með kvöldskíðun í Bláfjöllum. Lyfturnar voru lokaðar en það tryggði það eitt að enginn var að flækjast fyrir í brekkunum. Samkvæmt Yfir-Patról Bláfjalla hefur færið í Bláfjöllum aldrei verið betra, dúnamjúkur púðursnjór ofan á troðnum brautunum. Eftir 2-3 draumaferðir upp og niður Kóngsgilið var skíðalostanum fullnægt að sinni. Drekar sáust á flugi, púðraðar kellingar og himinlifandi skælbrosandi skátar.

Fasi tvö í norðurskíðaferð verður fyrripart morgundags með brottför kl. 9.00 frá M6 og er ferðinni heitið í Bláu fjöllin. Skíðað verður uns raðirnar verða orðnar of langar.

Þriðji og lengsti fasi Akureyrarferðarinnar hefst seinnipart laugardags þegar haldið verður úr bænum (líklega um 5/6 leytið), ekið eins og druslan drífur, tjaldað-sofið-étið, og svo arkað á eitthvert fallegt fjall á Suðurlandinu. Áhugasamir skrái sig á Korkinum eða hafi samband við Hrafnhildi.

ferðanefndin

—————-
Texti m. mynd: Púðursnjórinn troðinn upp fyrir hné í Kóngsgilinu
Höfundur: Hálfdán Ágústsson

Síðastliðin laugardag fóru sjö manns úr undanfarahóp og skoðuðu Þríhnjúkagíg. Þríhnjúkgagígur er hraunhellir og talinn vera stærsta hraunhvelfing í heimi. Síga þarf um 120 m niður og er síðan hægt að klöngrast um 80 m lengra niður á botn. Talsverðan tíma tók að koma öllum niður og upp og var síðasti maður kominn uppúr hellinum kl. 21. Menn voru heillaðir af því sem fyrir augum bar og hægt að sjá myndir sem Robbi tók.

—————-
Vefslóð: picasaweb.google.com/roberthalldorsson/RHnjKahellir
Texti m. mynd: Sigið niður í hellinn
Höfundur: Björk Hauksdóttir

Hjónin Magnús Bárðarson og Linda Björnsdóttir ásamt Pétri Ásbjörnssyni stóðu á tindi Mont Blanc sl. sunnudag. Það er HSSR mikill heiður að hafa átt þessa “eldri” borgara að í öll þessi ár. Magnús Bárðarson hóf feril sinn í HSSR haustið 1969 og hefur aldrei verið í betra formi en núna. Þess má geta að leiksystir þeirra hjóna, Ólafía Aðalsteinsdóttir var fyrst íslenskra kvenna til að sigra þetta hæsta fjall vestur Evrópu í leiðangri HSSR 1975.

Til hamingju Pétur Maggi og Linda.

—————-
Höfundur: Hlynur Skagfjörð Pálsson

Dagana 19.- 21 apríl voru sex félagar úr Eftirbátum og Sprettum á ferð um fjöll og dali í Fjörðum. Við hófum ferðina á fimmtudegi frá bænum Nípá í Köldukinn og gengum á gönguskiðum yfir Uxaskarð niður á Flateyjardalsheiði og að skálanum í Heiðarhúsum. Frekar snjólétt á Heiðinni en slapp þó. Daginn eftir vestur yfir fjöllin með viðkomu á Digrahnjúk, niður Leirdal og að skálanum á Gili. Þessa tvo daga var veður bjart og stillt og fínt til skíðagöngu. Á laugardag var norðan slydda og með hana í bakið gengum við upp Trölladal, yfir Þröskuld og niður að Grenivík. Síðan brunað í bæinn aftur á nýju rennireiðinni, Reyk-15.

—————-
Texti m. mynd: Skíðað niður Leirdal
Höfundur: Gunnlaugur Briem

Þrír félagar HSSR og einn Kópavogsskáti lögðu land undir fót fyrir páska og ætluðu að reyna fyrir sér í vorfærinu fyrir vestan. Klettafjöllin í Colorado tóku vel á móti fjórmenningunum og í stuttu máli dömpaði púðursnjónum flestalla dagana og sást til sólar inná milli. Upphaflega átti að notfæra sér lyftuþjónustu skíðasvæðanna í bland við toppatúra, en vegna mikillar snjókomu og fylgjandi snjóflóðahættu héldum við okkur að mestu leyti við lyfturnar – enda ósnertar brekkur í tugatali og engar biðraðir svona “leit-síson”. Nokkrar myndir á myndasíðunni.

Hrafnhildur, Hálfdán, Brynja og Hlynur

—————-
Höfundur: Hrafnhildur Hannesdóttir

Það voru fleiri undanfarar sem viðruðu sig um páskana. Steppo og Helgi skelltu sér í skíðaskútuferð á Hornstrandir í Dymbilvikunni. Heimsóttir voru Jökulfirðirnir Hesteyrarfjörður, Veiðileysufjörður og Lónafjörður. Brekkurnar voru gríðarlega fínar og færið ekkert til að kvarta yfir. Landkrabbarnir upplifðu hressilega 11 vindstiga nótt í skútunni og borðuðu sjávarmeti í hvert mál.

Ferð sem við mælum með!
Steppo og Helgi

—————-
Höfundur: Stefán Örn Kristjánsson

Dagana 11-17 mars gengu tveir félagar úr A-1 í HSSR og tveir félagar úr HSSG frá Svartárkoti og niður að Smyrlárbjargarvirkjun (fyrir neðan Skálfellsjökul) á skíðum með púlkur í eftirdragi.

Svona var þetta að mestu :

Sunnudagur 11.mars kl.1700 lagt upp frá Svartárkoti í Bárðardal og gengið að Botnum skála FFA og gist þar í góðu yfirlæti. Gönguleið ca. 15. km. Göngutími ca. 4,5 klst.

Mánudagur 12. mars kl.09.00 lagt upp frá Botnum og gengið að skála FFA í Dyngjufjalladal og gist þar í góðu yfirlæti. Gönguleið ca. 24. km. Göngutími ca. 8 klst.

Þriðjudagur 13.mars mars kl.0800 lagt upp frá Dyngjafjalladaskála og í gegnum Sigurðarskarð í Dyngjufjöllum í gegnum Öskju gengið yfir í Dreka skála FFA og gist þar í góðu yfirlæti. Gönguleið ca. 20. km. Göngutími ca. 8 klst.

Miðvikudagur 14.mars mars kl.0900 lagt upp frá Dreka og gengið yfir Dyngjuvatn,sunnan með Vaðöldu yfir Jökulsá á Fjöllum yfir hraunið vi Hvannalindir og yfir Kreppu að Einarsskála,(skála Völundar á Egilsstöðum) í Grágæsadal og gist þar í góðu yfirlæti. Gönguleið ca. 40. km. Göngutími ca. 12 klst.

Fimmtudagur 15.mars mars kl.0900 lagt upp frá Einarsskála og gengið yfir Kreppulón í Grágæsadal með og yfir Kverká og uppá Brúarjökiul og gist í tjöldum í góðu yfirlæti. Gönguleið ca. 19. km. Göngutími ca. 7 klst.

Föstudagur 16.mars mars kl.0900 lagt af stað frá tjaldstað ca 8 km. frá jökulrönd áleiðis eftir Breiðubungu og gist í tjöldum í góðu yfirlæti. Gönguleið ca. 28,5. km. Göngutími ca. 10 klst.

Laugardagur 17.mars mars kl.0900 lagt af stað frá tjaldstað á Breiðubungu og yfir Breiðubungu að Skálfellsjökli og niður hann að Jöklaseli og síðan niður veginn (snjór á veginum og hægt að skíða hann að mestu niður að brúnni í gilinu þar sem við vorum sótt) Gönguleið ca. 35. km. Göngutími ca. 12 klst.

Ferðin gekk í alla staði vel og gengu öll plön og áætlanir eftir (6,5 dagar). Vorum við heppin með veður þrátt fyrir skafrenning og blindu eina 2 daga.

Þáttakendur voru :

Eyrún Björnsdóttir HSSG

Linda Björnsdóttir HSSR

Stefán Gunnarsson HSSG

Magnús Dan Bárðarson HSSR

—————-
Vefslóð: 123.is/maggidan
Texti m. mynd: Lagt af stað frá Svartárkoti
Höfundur: Magnús Bárðarson

Laugardaginn 17. mars skíðuðu 6 félagar í A1 frá Meyjarsæti, austan í Ármannsfelli í Þingvallasveit, sem leið lá að Hvalfelli í vesturátt og niður í Botnsdal með Hvalvatnsá. Veður skipaðist á með éljum. Færið var púðrað og skyggni milli élja stórkostlegt. Leiðin var rúmir 25 km.
Félagar í A1 mæla með skíðagöngum sínum.

—————-
Texti m. mynd: Hvalfell nálgast
Höfundur: Anna María Lind Geirsdóttir

Nokkrir frískir sleðamenn úr HSSR brugðu sér á Grímsfjall um síðustu helgi. Boli var einnig á ferð þar og nýliðar í bílaflokk gerðu heiðarlega tilraun til að vera með en erfið snjóalög á jökli töfðu mjög för þeirra þ.a. þeir áttu náttstað Jökulheimum.

Þarna kom berlega í ljós að þær aðstæður eru oft fyrir hendi að 44″ bílar fara mun hægar yfir í snjó en Boli gerir. Bílarnir voru að ná 4 km/klst á jöklinum á meðan Boli gat siglt sína 20 km/klst.

Sjá fleiri myndir á myndasíðu.

—————-
Texti m. mynd: Leitað að leið yfir Tungná
Höfundur: Páll Ágúst Ásgeirsson