Þó að allt sé á útopnu hjá Neyðarkallssölufólki er samt tími til að lýta í myndavélina.
Takk, takk allir þeir sem hafa stutt okkur í dag.

—————-
Höfundur: Hlynur Skagfjörð Pálsson

Lagabreytingatillagan sem kynnt var á síðasta sveitarfundi hefur nú verið lögð inn á heimasíðuna okkar undir hlekknum 'Gögn'.

Tillagan er unnin af stjórnskipaðri nefnd sem tók sér góðan tíma í verkið. Engar meginbreytingar felast í tillögunni þó rétt sé að vekja athygli á eftirtöldum breytingum (sjá nánari skýringar í tillögunni):

Tekið út að HSSR sé aðili að Skátasambandi Reykjavíkur.Ákvæði um gestaaðild er nýmæli.Bætt er inn kafla um nýliða. Grein um fundi er skipt upp í aðal- og sveitarfundi.Fundaskipulag stjórnar einfaldað og bætt inn að æski 3 stjórnarmenn eftir fundi skuli hann haldinn.Krafa um löggilta endurskoðun reikninga felld út og innri skoðunarmönnum fjölgað í 2.Fest í lög skylda stjórnar til að bóka ákvarðanir varðandi ráðstöfun í og úr rekstrarsjóði.Stjórn HSSR leggur tillögu að skipulagi sveitarinnar fyrir sveitarfundi í stað þess að setja reglugerð um flokka. Tillagan verður til afgreiðslu á aðalfundi HSSR sem er á dagskrá í nóvember 2012.

—————-
Texti m. mynd: Með lögum er byggt, ólögum eytt.
Höfundur: Örn Guðmundsson

Birgir Blöndahl í Undanrennum er nú farinn til Patagoniu í Chile þar sem hann er að byrja á sex vikna námskeiði hjá fjallamennskuskóla í suður Chile (http://mountaineeringtrainingschool.com/ ). Námskeiðið byrjar í byggð þar sem verið er að undirbúa ferðina inn á jökul. Á miðvikudag fer hann inn á jökul og verður samfleytt þar í fimm og hálfa viku í tjaldi og snjóhúsum. Nemendur í hópnum eru 6 – 8 auk fjögurra leiðbeinenda. Námskeiðið felst í fjalla- og ferðamennsku við krefjandi aðstæður þar sem markmiðið er meðal annars að gera þátttakendur hæfari í að leiða og skipuleggja fjallaferðir auk þess að gera þátttakendur hæfari í að bjarga sér og öðrum við erfiðar aðstæður. HSSR veitir styrk til ferðarinnar þar sem öll slík reynsla og þekking er kærkominn inn í starfið hér heima.

Upphafsstaður námskeiðsins er Coihaique í suður Chile.

—————-
Texti m. mynd: Á leið á Hrútfjallstinda
Höfundur: Arngrímur Blöndahl

Tvö stór námskeið voru haldin um helgina að Úlfljótsvatni. Þar voru annars vegar 30 nýliðar 1 á sínu fyrsta námskeiði að læra rötun og svo hins vegar um 20 nýliðar 2 að læra leitartækni. Með leiðbeinendum, aðstoðarfólki og framúrskarandi kokkaliði sveitarinnar voru þetta alls um 70 manns. Vel heppnuð námskeið sem voru keyrð áfram að mestu leyti af sama fólki og hafði staðið vaktina fyrir norðan dagana á undan eftir óveðurshvellinn þar!

—————-
Texti m. mynd: Áttavitastefnur teknar af korti á rötarnámskeiðinu
Höfundur: Einar Ragnar Sigurðsson

Í fyrradag settum við upp búðir fyrir danska greiningasveit í Mestervig á Grænlandi og aðstöðu fyrir stjórnstöð á eyjunni Elle sem er 80 km innar í firðinum þar sem Mestersvig er staðsett. Síðustu tvo daga höfum við síðan séð um að halda búðunum í gangi og aðstoða Danina við hin ýmsu verkefni. Í gær voru búðirnar í Elle teknar niður og fluttar um borð í varðskipið Þór. Í morgun var síðan síðasti hluti búðanna í Mestersvig tekinn niður, fluttur landleiðina til Nyhave þar sem mest af honum fór í báta og út í skip. Þyngstu hlutirnir, s.s. Trelleborgartjöldin, stóra rafstöðin, hitarinn, kerran og fjórhjól þeirra Suðurnesjamanna voru fluttir með þyrlu frá dönsku varðskipi út í Þór. Nú er allur hópurinn kominn um borð í Þór sem hefur tekið stefnuna á Ísland. Við erum mjög sátt og reynslunni ríkari.

Kveðja frá Grænlandsförum

PS Myndir verða að bíða heimkomu.

—————-
Höfundur: Svava Ólafsdóttir

Í nótt kl 4:00 fór fríður hópur úr búðahóp HSSR ásamt félögum í Björgunarsveit Hafnarfjarðar og Björgunarsveitinni Suðurnes með danskri Hercules C130 herflugvél til Grænlands að taka þátt í æfingunni SAREX 2012.

Nánar má lesa um æfinguna á heimasíðu SL

Það verður spennandi að fylgjast með félögum okkar í Grænlandi.

—————-
Texti m. mynd: Hercules vél danska hersins hlaðin
Höfundur: Hilmar Már Aðalsteinsson

Nú er verið að fara yfir Bola fyrir komandi vetur. Ein afleiðing af ösku á jökli er aukið viðhald á slitflötum í undirvagni. Nú er verið að skipta um þéttingar í drifás, samsláttarpúða auk þess að nokkrar glussaslöngur verða endurnýjaðar. Eftir áramót er svo gert ráð fyrir að skipta um fjaðrir undir Bola. Þar er nokkuð kostnaðarsöm aðgerð, innkaupsverð á þeim er um 850.000.

Gert er ráð fyrir að því viðhaldi sem nú er verið að sinna verði lokið fyrir 20. september

—————-
Höfundur: Haukur Harðarson

Nýlega stóðust Hneta og Stefan B-próf á Neskaupsstað og eru því komin sem teymi á útkallsskrá hjá Leitarhundum. Fyrir eru þar frá HSSR Slaufa og Berglind þannig að nú á HSSR tvö teymi á útkallsskrá. Glæsilegur árangur og skemmtileg þróun.

—————-
Texti m. mynd: Stefan og Hneta að loknu prófi
Höfundur: Haukur Harðarson

Nýliðastarf HSSR sem er að hefjast var kynnt þriðjudaginn 4. september. Fyrst á dagskrá hjá verðandi nýliðum er kynningarferð á Helgafell. Mæting á Malarhöfða 6 kl. 17:45 og brottför kl. 18:00.

Kynninguna má sjá hér: http://eirasi.net/nylidakynning2012.pdf

og nýliðabæklinginn má nálgast hér: http://issuu.com/olijon/docs/hssr-nylidar-2012

Skráningarform er hér: https://hssr.is/images/gogn/ALM_0905_1607_50_1.pdf

Fyrsta námskeiðið er þriðjudag 11. september kl. 20:00 þar sem farið verður í búnað sem er nauðsynlegur á fjöllum. Þá rennur einnig út frestur til að sækja um í nýliðastarfinu sem er að hefjast.

—————-
Höfundur: Einar Ragnar Sigurðsson

Dagana 12.-16. september mun búðahópur HSSR taka þátt í SAREX 2012, stórri samæfingu margra þjóða í Meistaravík á Grænlandi. Æfð verða viðbrögð við því ef stórt skemmtiferðaskip strandar við austurströnd Grænlands, nánar tiltekið Ella-eyju. Leki kemur að skipinu og fjöldi smáelda kvikna, en skipið flýtur og heldur kili. Verkefni búðahóps verður að setja upp og starfrækja búðir fyrir aðra björgunaraðila í æfingunni.
Þátttakendur frá Íslandi, auk HSSR, eru Björgunarsveit Hafnarfjarðar og Björgunarsveitin Suðurnes. Aðrar þátttökuþjóðir eru Grænland, Danmörk, Noregur, Svíþjóð, Færeyjar, Bandaríkin og Kanada, en þær eiga sammerkt að eiga hagsmuna að gæta á norðurskautinu.
Flogið verður utan með C-130 þungaflutningavél frá bandaríska landhernum og komið til baka með varðskipinu Þór.

—————-
Texti m. mynd: SAREX 2012
Höfundur: Ólafur Jón Jónsson