Author Archives: Hjálparsveit skáta í Reykjavík

Stofnfundur Vina HSSR

Stofnfundur Vina HSSR var haldinn17. september sl.
Í ávarpi sveitaforingja HSSR Hauks Harðarsonar kom m.a. fram að stjórn sveitarinnar ákvað að koma á laggirnar undirbúningsnefnd um stofnun hollvinasamtaka.
Nefndin tók til starfa vorið 2013. Í henni hafa setið: Benedikt Þ Gröndal formaður, Eggert Lárusson og Laufey E Gissuradóttir.
Í fyrstu tók nefndin mið að því að ná til félaga sem höfðu undirskrifað eiðstaf sveitarinnar eftir endurreisn hennar árið 1962. Hugmyndin  væri síðan að ná til félaga fyrir þann tíma síðar. Tilgangurinn með stofnun samtakanna væri fyrst og fremst að ná til þeirra sem vilja starfa með sveitinni og að þeir sem komi til starfa geti valið sér vettvang til að vinna að.

Að loknu máli formanns undirbúningsnefndar kallaði fundarstjóri fram fyrstu stjórn samtakanna sem skipuð er af stjórn HSSR,  í henni eiga sæti: Thor B. Eggertsson formaður, Laufey E Gissuradóttir ritari. Meðstjórnendur eru:  Eggert Lárusson, María Haraldsdóttir og Ævar Aðalsteinsson.

Að því loknu lýsti fundarstjóri  yfir stofnun  Vina HSSR – Hollvinasamtaka HSSR við dynjandi lófatak fundarmanna.

Þess má geta að nær allir fundarmenn skráðursig á félagalista Vina HSSR en á fundinn mættu tæplega hundrað manns.

8 sveitarforingjar HSSR. Í fremri röð Tryggvi Páll Friðriksson, Jóhannes Briem, Thor Eggertsson. Aftari röð; Jón Baldursson, Benedikt Gröndal, Haukur Harðarson, Ingimar Ólafsson og Kristinn Ólafsson. Myndin í bakgrunni er af fyrsta sveitarforingja HSSR og einum stofnanda, Jóni Oddgeiri Jónssyni.

Átta sveitarforingar 2014

Þverun straumvatna 2014

HSSR og nýliðar 2 skelltu sér í Krossána seinasta laugardag 6. sept. Þetta er eitt blautasta námskeið sem fólk kemst á. Byrjuðum í rólegu vatni upp að hnjám og enduðum í bringuháum holum. Fórum yfir öll öryggisatriði, frá því að kasta kastlínu og pendúla mannskap yfir Krossá yfir í hvernig á að synda í straumvatni. Eftir nokkurra tíma sull voru flestir kaldir en góðir, þá var ferðinni heitið í smá gilabrölt og skoða fossa í Gígjökli eins og hópmyndin sýnir hér að neðan. Þakka gott námskeið.

–Halldór Ingi Ingimarsson
Þverun straumvatna 2014

Helgafellsgangan 2014

Eftir nýliðafundinn á þriðjudaginn var áhugasömum boðið í göngutúr á Helgafell í Hafnafirði. Farin var hefðbundin leið upp úr Valahnúkaskarði og tekið stutt stopp uppi á toppinum, skrifað í gestabókina, nestis neytt og fjallasýnarinnar notið.10

Svo var haldið áfram yfir Fellið, niður í gegnum gatið og svo til baka meðfram fjallsrótum austurfyrir.

Nýliðarnir stóðu sig vel og hópurinn náði aftur vel fyrir sólarlag þrátt fyrir berjatínslu og spjall. Sveitarfélagar nutu samvistanna við þetta hressa fólk sem mun sæma sig vel í starfi Sveitarinnar. Continue reading

Umsóknarfrestur og fyrstu námskeið nýliða

Næstkomandi þriðjudag, 9. september kl. 18 að Malarhöfða 6, verður fyrsta viðburðurinn í þjálfun nýrra nýliða. Það er undirbúningur fyrir námskeiðið Ferðamennska og rötun og verður farið yfir pökkun í bakpoka og önnur nauðsynleg þekkingaratriði. Við minnum á að umsóknarfrestur rennur út að kvöldi þess sama dags. Umsóknum er skilað rafrænt og er slóðin bit.ly/hssr-umsokn-2014.

Um næstu helgi, 12.-14. september, verður fyrsti stóri viðburðurinn fyrir nýliða 2014-16 haldinn, en það er helgarnámskeiðið Ferðamennska og rötun sem haldið verður við Úlfljótsvatn. Þetta er mikilvægt grunnnámskeið sem liggur til grundvallar flestu því sem gerist eftirleiðis í þjálfuninni þannig að áríðandi er að nýliðar mæti þar.

Bæklingur til kynningar nýliðaþjálfun 2013-15 er hér http://issuu.com/hssr/docs/hssr-nylidabaeklingur-2014. Sé frekari upplýsinga þörf er hægt að senda nýliðaforingjum póst á netfangið hssr.nylidar.2014 hjá gmail.com

Við vonumst til þess að sjá sem flesta í sterkum og öflugum hópi nýliða.

Kynning á nýliðastarfi HSSR

ER1_8104
Þriðjudaginn 2. september heldur HSSR kynningarfund á nýliðastarfi sínu sem byrjar nú í september. Nýliðaþjálfunin er fyrir alla þá sem hafa áhuga á að taka þátt í starfi björgunarsveita og hafa áhuga á útivist.

Kynningarfundurinn hefst klukkan 20:00 og er haldinn í húsnæði sveitarinnar á Malarhöfða 6. Miðað er við að félagar á fyrsta ári séu fæddir 1996 eða fyrr.

Stofnun samtaka hollra vina eða bakhjarla HSSR

Stjórn HSSR boðar til fundar um stofnun samtaka hollra vina eða bakhjarla HSSR, og eru allir sem hafa einhvern tíma verið félagar, eða eru félagar velkomnir á fundinn sem verður haldinn;

í húsnæði HSSR að Malarhöfða 6, miðvikudaginn 17.september  2014  kl 20:00.

Vorið 2013 ákvað stjórn HSSR að hefja vinnu sem miðaði að því að ná saman á einn stað  nöfnum sem flestra félaga, sem einhvern tíma hafa starfað innan vébanda HSSR.

Stjórn sveitarinnar vill með þessu  reyna að endurnýja sambandið við gamla félaga sveitarinnar og stuðla að endurnýjuðum kynnum meðal  gamalla félaga, með það að markmiði að úr geti orðið einhverskonar hollvinasamtök vina eða bakhjarla, hópur eldri og reyndari félaga sem getur stutt við starfsemi HSSR með margvíslegu móti.

Undirbúningsnefndin hefur unnið talsvert starf við að samræma ýmsa félagalista og finna frekari upplýsingar um hvern og einn, eins og t.d. netföng. Nú er búið að skrá á nýjan lista milli 600 og 700 félaga, en þar af er u.þ.b. helmingurinn enn  skráður á einhverskonar félagalista innan HSSR.

Stefnt er að því að samtökin verði málefnamiðuð samtök sem taki að sér ýmiskonar vinnu við málefni sem hinir starfandi félagar eru ekki að sinna, en koma HSSR til góða.

Hugmyndin er að á fundinum verði kosin 5-7 manna stjórn samantakanna til 2-3 ára. Stjórnin verði ábyrg gagnvart stjórn HSSR og gefur henni stutta skýrslu um starfsemi samtakanna í lok hvers árs.

Undirbúningshópurinn telur áríðandi að halda starfseminni eins einfaldri og helst skemmtilegri, þannig að reyna megi eftir megni að endurupplifa „ævintýrið“ að vera félagi í hjáparsveit, og gera í leiðinni „gömlu sveitinni“ sinni eitthvert gagn.

Stjórn Hjálparsveitar skáta í Reykjavík óskar sérstaklega eftir að SJÁ ÞIG á fundinum, og vonar að ÞÚ getir áfram átt gott samstarf með gömlum og nýjum félögum innan HSSR.

Nánari upplýsingar um fundinn verða sendar út í byrjun september.

Þeir sem vilja geta sent upplýsingar um netfang sitt á bensi.grondal@simnet.is

f.h. undirbúningshópsins:

Benedikt Þ Gröndal

Eggert Lárusson

Laufey Gissurardóttir

Hópferð á björgunarráðstefnu í New Jersey í Bandaríkjunum.

Björgunarskóli SL stóð fyrir hópferð á sameiginlega ráðstefnu MRA (Mountain Rescue Association) og NASAR (National Associaton for Search and Rescue) sem haldin var í New Jersey í Bandaríkjunum dagana 5.-7. júní sl.
Fyrir tveimur árum síðan skipulagði SL hópferð á WASAR ráðstefnuna í Washington fylki Bandaríkjanna og skemmst er frá því að segja að færri komust að en vildu og ferðalangar voru almennt mjög ánægðir með ferðina. Þess vegna var ákveðið að slá saman í aðra ferð. Í þetta skiptið var stefnan tekin á New Jersey á austurströnd Bandaríkjanna. Ráðstefnan fór fram í bæ sem heitir Woodcliff Lake í New Jersey en bærinn er í um það bil 5o mínútna fjarlægð frá Manhattan eyju New York borgar.

Þátttakendur frá Íslandi voru alls 34, frá björgunarsveitum víðs vegar að frá landinu.
Fimm björgunarmenn frá HSSR tóku þátt að þessu sinni. 

Þetta er í annað skipti sem að NASAR og MRA halda sameiginlega ráðstefnu en björgunarmenn frá Íslandi hafa oft sótt ráðstefnu NASAR í gegnum tíðina enda góð og umfangsmikil ráðstefna. Dagana fyrir ráðstefnuna voru einnig haldin námskeið fyrir þá sem höfðu áhuga á þeim.
Tóku flestir íslensku þátttakendurnir þátt í 1-2 heildagsnámskeiðum fyrir sjálfa ráðstefnuna og var m.a. stór hópur sem sat 8 tíma námskeið í Urban Search Management eða Aðgerðarstjórnun í innanbæjarleit.

Á sjálfri ráðstefnunni voru ýmsir 1 – 2 klst. fyrirlestrar í boði.
Sem dæmi má nefna; sporrakningar, fjallabjörgun, línuvinna, slysaförðun, leitartækni, aðgerðarstjórnun, snjóflóðahætta, samskipti við aðstandendur, fyrstu viðbrög í leit og björgun, viðtalstækni fyrir björgunarmenn/aðgerðarstjórnendur og svona mætti lengi telja.

Var það samdóma álit flestra þátttekenda að ráðstefnan hefði verið í alla staði mjög lærdómsrík og að  íslenskir björgunarmenn ættu fullt erindi á slíka viðburði erlendis.

Hópurinn samankominn fyrir framan hótelið 🙂
NASAR 2014

 

 

Búðahópur HSSR á Modex 2014

Í gær fór búðahópur HSSR til Danmörku til að taka þátt í MODEX 2014 sem hluti af Íslensku alþjóðabjörgunarsveitinni (ÍA).
MODEX er æfing á vegum Evrópusambansins í almannavörunumum (The Union Civil Protection Mechanism) þar sem æfð verða viðbrögð við nátturhamförum og mikil áheyrsla lögð á samstarf á milli þjóða.  Á æfingunni mun ÍA einnig fara í gegnum endurúttekt hjá INSARAG sem eru reghlífasamtök rústabjörgunarsveita hjá Sameinuðuþjóðunum, en sveitin þarf að fara í endurúttekt hjá UN á 5 ára fresti.
Á æfingunni verða einnig rústasveitir frá Svíþjóð og Ítalíu, ásamt TASK sveit frá Þýskalandi. Danish Emergency Management Agency (DEMA) sér um framkvæmd æfingunnar og fer hún fram á æfingasvæðinu í Tvingle í Danmörku.  Þátttaka ÍA á æfingunni er kostuð af Evrópusambandinu.

Svava Ólafsdóttir.

Öræfajökull helgina 9. – 11. maí sl.

Á föstudagseftirmiðdegi lagði lítill hópur frá M6 austur á land með stefnu á Skaftafell. Umtalsverð afföll höfðu orðið vegna veikinda þessa síðustu daga fyrir brottför, en hópurinn varð bara einbeittari í ferðagleðinni fyrir vikið. Spár voru ágætar en höfðu samt verið nokkuð á flakki síðustu daga, og þó svo að Belgingur væri farinn að spá einmuna blíðu á sunnudaginn um það leyti sem við komum austur var ákveðið að halda striki og leggja í‘ann þá um nóttina.
Á leiðinni austur hittum við góða félaga, en þeir Örvar, Ævar, Höskuldur og Pétur voru einmitt á leið austur að stýra FÍ ferð á Hrútfellstinda, og höfðu sömu ferðaáætlanir og við.
Við komum síðla í Skaftafell, reistum tjöld, fengum okkur bita og lögðum okkur í einn og hálfan tíma. Þá var ræst í göngu. Lagt var uppfrá Sandfelli rétt uppúr eitt um nóttina. Veður var milt og stillt framanaf og er birti af degi, um það bil sem við vorum komin í línu, var fjallasýnin hreint yndisleg.
0118370367e9252b8da88ecdc8b2ce4e723712ae85

Brekkugöngutangó

Færið var eilítið blautt neðst í brekkunni en fljótlega tók við nokkuð velfrosin fokskel sem hélt flestum, nema fyrsta og síðasta manni sem ávallt stigu niðurúr þekjunni. Var göngulínan því nokkuð sérkennileg álengdar þar sem öll línan gekk svo sem meter til hliðar af nýsporaðri gönguleið, markeraðri af fremsta manni, og tiplaði þar eftir óbrotinni fönninni svo varla markaði fyrir.
Blessunarlega styrktist skelin þegar ofar dró svo það fengu allir að skauta á yfirborðinu, en samhliða kólnaði eilítið og tók að hreyfa vind. Fljótlega eftir að við náðum að sjá takmarkinu bregða fyrir, þar sem Hnjúkinn bar við heiðan, bláan himinn, byrjaði að mugga og skýjaslæður lögðust yfir okkur í síðustu brekkunni uppá skálarbarm.

Skálarskán

Sjálf skálin var ekki svo erfið yfirferðar þó eitthvað væri aftur stigið niður úr snjónum. Skyggnið varð reyndar sífellt minna en svo bar við að við sáum tjöld álengdar norðan við uppstigið sem við ákváðum að kanna betur, svona til öryggis. Er við komum nær var ljóst að þarna voru vel uppsettar búðir skíðamanna og okkur datt í hug að þarna gætu Flubbar verið á ferð. Við sannreyndum það reyndar ekki, heldur ákváðum að halda beinustu leið og sjá hvort við kæmumst a.m.k. ekki uppfyrir þann punkt þar sem snúið var við í fyrra, því er hér var komið var sögu var farið að blása nokkuð hressilega og skyggnið dottið niður í nokkur hundruð metra.
Við höfðum haft af því spurnir að vikuna áður hefðu allar sprungur verið vel fylltar og harðfenni yfir öllu.  Við vonuðum að það væri enn færið, skelltum okkur á broddana og héldum á brattann. Greinilegt var að eitthvað hafði tekið upp af snjónum því sprungur voru hálffylltar en markaði samt ágætlega fyrir þeim. Töluvert frauð var líka í yfirborðinu.
0122d8b5a3a63697b20dec15d2841ad799ac24e392015734738e20c997690a83c225808d2d4856c044a1

15 metrar (bæði skyggni og blástur)

Fyrsta kastið gekk nokkuð vel en er ofar dró, brattinn jókst á sama sama tíma og skyggnið minnkaði og bætti í vindinn, var eiginlega útséð um þessa ferð. Þegar kom loks að því að skáskera eina brekkuna í um 15m/s vindi, í 10-15 metra skyggni, var komið að því að taka ákvörðun og snúa við.
Voru allir afar sáttir við þá ákvörðun, og þó enginn hafi enn verið orðinn eitthvað mikið þreyttur á sinni, þá létti yfir mannskapnum sem gladdist verðskuldað yfir að hafa náð þetta langt við afar krefjandi aðstæður. Veitti ekkert af þessu góða skapi næsta hálftímann þegar við reyndum að þræða okkur niður til baka. Tóku GPS tækin uppá undarlegum uppátækjum (sem skilaði að lokum hæsta punkti 2237m! úr einni slóðinni), sem  truflaði okkur aðeins en ekki meira en svo að heil á höldnu komumst við niður í skálina aftur, sem var eins gott því við misstum Birnu einu sinni hálfa niður í myndarlega sprungu sem var aðeins hulin fremur þunnri skel.
Leiðin niður var svo lítt eftirminnileg, eins og svo oft; stigin algerri hvítu og sí-blautari snjó. Það var samt enn glaður og sprækur hópur sem skilaði sér í bíl, sumir eftir eilítinn auka útsýnishring um Sandfellið.01505af40bc88d8e2d6a715cd8099571346bde0464

Á sama tíma að  ári

Við fórum flest snemma í bælið, eftir yndislega grillveislu, og sum hver strax farin að skipuleggja næsta könnunarleiðangur að ári: Verður áherslan þá færð af Öræfajökli á Hvannadalshnjúkinn sjálfan, sem hefur verið látinn liggja milli hluta hingað til.

Stefán Baldur Árnason

E.s. Leiðangursmenn þakka Kristni sérstakleg fyrir Mary-Poppins atriðið í tjaldbúðunum. Það mun lifa lengi með okkur.

 

 

Gönguskíðaferð HSSR yfir Langjökul 22.-23. mars.

Eftir margrómaða æfingaferð inn í Landmannalaugar í Febrúar var stefnan tekin á þverun Langjökuls.

Við leiðarval var stuðst við jöklasprungukort Landsbjargar, spjall við aðila sem þekkja svæðið, og hvernig best væri að komast að og frá jökli á 38“ breyttum bílum.

Plan A og B sprungurÁ korti má sjá leiðarval: “Plan A og B”, fylgdum bláu að hábungu og þeirri rauðu niður að Skálpanesi.

Áætlað var að leggja af stað úr bænum á föstudagskvöld og tjalda við rætur jökulsins þá um kvöldið, en vegna mjög slæms veðurs á föstudagskvöld var stefnan sett að Jaka snemma á laugardagsmorgni. Farið var í skíðin ca. 1 km norðan við skálann Jaka og stefnt í suðaustur í átt að náttstað. Gangan gekk vel og allir í góðum gír, færið vel ásættanlegt og sóttist ferðin vel þó flestir væru með púlkur eða snjóþotur í eftirdragi. Skyggni var ágætt til að byrja með en var frekar lítið þegar á leið daginn en birti þó upp síðdegis og blöstu Kerlingarfjöll, Bláfell, Hekla og Jarlhettur við göngumönnum og konum.

DSC09318

Ákveðið var að ganga rösklega til kl. 18 og koma upp tjaldbúðum á þeim tímapunkti. Endaði dagurinn í 25km göngu og allir vel sáttir með gott dagsverk í 1220m hæð yfir sjávarmáli. Slegið var upp búðum og hafist við að bræða snjó til að halda við vatnsbirgðum ,elda matinn og hella uppá kaffi.  Gengið var til náða um kl.10 og farið að heyrast hrotur úr nokkrum tjöldum fljótlega eftir það.

DSC09340      043

Á sunnudeginum var ræs kl. 7 og hafist handa við að elda morgunmat, bræða snjó, taka til tjöld og koma sér í skíðin í fimbulkulda og roki.  Ferðin niður að skálpanesi sóttist frekar hægt sökum slæms skyggnis m.a. En allt gekk þetta að lokum og var komið að skálanum við Geldingafell um kl. 15.00 eftir 20km göngu þann daginn.

035

Myndir:  Tomasz Chrapek og Kjartan Long