Á morgun, 29.11, stendur tímaritið Útivera fyrir fjallamyndasýningu á Hótel Nordica. Þeir sem misstu af Pakistanmyndasýningunni á M6 hafa tækifæri til að berja ögn styttri útgáfu af henni augun á morgun.

Nánari upplýsingar á heimasíðu Útiveru.

—————-
Vefslóð: utivera.is
Texti m. mynd: Auglýsing frá Útiveru
Höfundur: Stefán Örn Kristjánsson

Fyrsta kvöld nóvembermánaðar tóku sex stykki undanrennur sig til og æfðu snjóflóðaýlaleit af miklu kappi. Rölt var áleiðis í Elliðaárdalinn hvar fundinn var vel myrkur ríflega tveggja hektara partur af úthaga frá Árbæ. Þar var haganlega komið fyrir tveimur appelsínugulum og sá þriðji notaður til að elta hina tvo uppi. Var mat viðstaddra að æfingin hefði verið gagnleg mjög – þrátt fyrir skort á “ekta-undanförum”, sem voru uppteknir við fundarhöld þetta kvöld.

Myndir frá æfingunni eru á myndasíðu.

—————-
Höfundur: Jóhanna Katrín Þórhallsdóttir

Austurdalsferðin tókst með eindæmum vel, þrátt fyrir að stór hluti leiðarinnar hafi verið genginn í tunglsljósinu einu saman. Þar var á ferð vel upplýstur hópur sem hafði meðal annars í huga að kynna sér hugsanlegar virkjunarframkvæmdir Skagafjarðarmanna. Frækinn hópurinn (og þá sérstaklega nýliðarnir!) komst í hús (Hildarsel) eldsnemma á laugardagsmorgun (kl. 4.30) eftir dágóða göngu frá Merkigili, yfir Moniku-brú, framhjá Ábæjarkirkju, nokkra læki, hóla og hæðir. Reykur III trússaði innað skála, en var aðeins kominn á staðinn stuttu á undan hópnum, vegna illsjáanlegs slóða.

Laugardagurinn tók á móti okkur með glaða sólskini og hvínandi roki, hvassviðrið var hvílíkt að bakpokar og höfuðföt göngumanna fuku um koll og kolla. Gengið var í átt til sólar, inn Austurdal með vindinn í fangið framan af. Gróskumiklar hlíðar dalsins skörtuðu sínu fegursta í öllum mögulegum haustlitum og var þetta allt saman myndað í bak og fyrir. Þegar leið á daginn fannst nokkrum pörupiltum sólin vera farin að hita mikið og góð ástæða til að fara úr að ofan. Frést hefur að þeir hinir sömu séu nú uppfullir af hósta og kvef bakteríum. Þegar síðasta vaðið var vaðið skall myrkrið á fyrirvaralaust og upphófst vandasamur ratleikur um skógivaxnar hlíðar dalsins. Með mikilli útsjónarsemi og ratvísi komst hópurinn uppá fjallsbrún og gekk sem leið lá í bílana (með nokkrum hlykkjum þó). Laugafelli var náð um miðnætti og skelltu menn og konur sér í laugina, ýmist með eða án sundfata. Grill, svolítið grín og að lokum kojan. Burrað í bæinn á góðum millitíma. Ekki féllu nema 3 regndropar úr lofti þessa helgina, þrátt fyrir heilmiklar spár um annað.

—————-
Texti m. mynd: Nýliðar á leið yfir Hölkná
Höfundur: Hrafnhildur Hannesdóttir

Hallgrímur Magnússon, félagi í HSSR og Leifur Örn Svavarsson og náðu í gær að komast upp á Leníntind í Kyrgiztan en þessi tindur er 7.134 metrar á hæð.
Aðstæður í gær voru erfiðar þar sem var mjög kalt og mikill vindur en þeir komust upp eftir 9 klukkustunda göngu úr búðunum sem eru í 6.200 hundruð metra hæð. Gangan upp á tindinn tók hins vegar hátt í tvær vikur.

—————-
Texti m. mynd: Lenín tindur
Höfundur: Haukur Harðarson

Menn eru vel sturtaðir, greiddir og snyrtir, búnir að drekka kók úr gleri og aðlagaðir inn i nútíma neyslusamfélag eftir að komið var af fjöllum. Að svo miklu marki sem Gilgit getur talist neyslusamfélag.

Vid heldum upp i fjöllin fyrir mörgum, mörgum dögum. Bárum allt okkar dót med okkur (klettþungir) i leið sem við höfum ekki séð áður, á fjalli sem er ekki til. Að minnsta kosti ekki á korti. Fyrsti dagurinn var 5 km. i loftlínu og hækkun úr 3600 i rúmlega 4700 metra, með tjald, mat i 4 daga, 2 línur og svo framvegis. Lausir risahnullungar sem hreyfast i hverju skrefi.

Svona byrjar ferðasagan hjá Pakistanförunum okkar á fjallið sem ekki er til á kortum en þeir höfðu í huga að skýra Iceland Peak ef þeir kæmust upp. Á http://alpaklifur.blogspot.com/ er hægt að lesa alla söguna.

—————-
Vefslóð: alpaklifur.blogspot.com
Höfundur: Haukur Harðarson

Frá og með fimmtudeginum og út næstu viku muni gista hjá okkur hópur frá breska hernum. Í upphafi verður hópurinn aðeins tveggja manna en stækkar síðan og um miðja næstu viku verða þeir um þrjátíu. Þeim fylgja 8 – 10 bílar, þar af fimm Landrover jeppar sem taka þátt í Rally Reykjavík en það er megintilgangur heimsóknar þeirra. Þeir verða á loftinu og salnum auk þess að hafa aðgengi að eldhúsi og setustofu. Endilega komið og heilsið upp á kappanna

Munið eftir bloggsíðu Pakistanfarana http://alpaklifur.blogspot.com/ þar sem er að finna skemmtilegar fréttir af þeim.

—————-
Vefslóð: alpaklifur.blogspot.com
Höfundur: Haukur Harðarson

Nú styttist í að fjórir félagar HSSR haldi af stað í fjallgönguferð í Alpana. Ferðin er hugsuð sem endurmenntunarátak Spretta þetta árið, og eru bundnar nokkrar vonir við að þeim félögum takist að komast á tindinn. Reynt verður að senda fréttir af ferðum félaganna, ef eitthvað fréttnæmt gerist.

—————-
Höfundur: Ævar Aðalsteinsson

Strákarnir eru nú við afslöppun í bænum Darkot
í Yasing dal. Eins og til stóðfóru þeir á pólóleikinn fræga í Shandur Pass, en sá staður er í 3800 mhæð. Þetta var ekki tíðindalítill viðburður því þegar leikar stóðu sem
hæst varð uppþot meðal áhorfenda, en þeirra á meðal var Pervez Musharraf,
forseti Pakistan. Einhverjir meðal áhorfenda töldu sig finna
jarðskjálftakipp og við það fór allt úr skorðum, áhorfendur hlupu út um
allt, m.a. inn á völlinn. Öryggisgæslan var ströng vegna viðveru
forsetans og beitti lögreglan talsverðu harðræði við að koma ró á
mannskapinn.
Stemmingin er fín fyrir utan magakveisu sem
eitthvað hefur hrjáð Helga og Sissa. Strákarnir eru líka fegnir að hafa
lokið jeppaferðalögum um stund, þeir voru orðnir hundleiðir á að hossast í
fleiri tíma á erfiðum vegum. Hitinn hjá þeim er viðráðanlegur núna, um 25°
C en var yfir 30° C á pólóleiknum, og það í 3800 m hæð.

Nú fer púlið að taka við, fylgist með!

—————-
Höfundur: Haukur Harðarson

Þeir eru komnir til Pakistan, til borgarinnar Rawalpindi en þar munu gistu þeir á hóteli fyrstu þrjár næturnar. Rawalpindi er skammt sunnan við höfuðborgina Islamabad.
Þeir sluppu við alla yfirvigt í fluginu en lent í smá vegabréfavandræðum sem þó leystust. Pakistanskur vinur Helga sem heitir því magnaða nafni Muhamed Ali, hefur verið þeim mikið til aðstoðar.

Fjórða júlí voru þeir vel stemmdir uppi í fjöllunum í Chitral Gol þjóðgarðinum. Þeir eru búnir að ganga mikið, hækkuðu sig um 1400 m, upp í 3200 m.y.s. Þeir vörðu síðustu tveimur dögum í menningarskoðun í Kalasha dölunum, enda stórmerkilegt fólk sem býr á þessum slóðum og saga þess áhugaverð.

Næstu daga halda þeir áfram á þessari göngu, meðal annars yfir fjallaskarð í tæplega 4000 m hæð og enda svo á bílferð aftur til Chitral. Svo styttist í að haldið verði upp í fjöllin fyrir alvöru, upp í grunnbúðir þaðan sem piltarnir ætla að klífa ýmis fjöll.

—————-
Vefslóð: alpaklifur.blogspot.com
Höfundur: Haukur Harðarson

Í dag leggja félagar okkar í tveggja mánaða klifurferð til Pakistan. Að undanförnu hefur undirbúningur staðið yfir og þegar ég heimsótti þá á þriðju hæðina í gær var verið að leggja lokahönd á pökkun. Helsta áhyggjuefni þeirra var þyngd á farangri en auk þess var komið smá stress enda var nú farið að telja niður í klukkustundum en ekki dögum.
Ég vil minna á bloggsíðuna þeirra http://alpaklifur.blogspot.com/ Þar er hægt að fylgjast með framvindu leiðangursins en auk þess verða fréttir á vef HSSR.

Góða ferð

—————-
Vefslóð: alpaklifur.blogspot.com
Texti m. mynd: Hálfdán, Helgi, Stefán Örn og Sveinn
Höfundur: Haukur Harðarson