Undanfararnir bjuggu til línubrú frá toppi Höfðaturns niður á jörðu á Menningarnótt. Er þetta í þriðja skiptið sem þessi sýning er haldin og heppnaðist hún að öllu leyti vel.
Oft er talað um að það sé kalt á toppnum en það átti ekki við í þetta skiptið því að svo heitt var á toppi Höfðaturns að föt fengu að fjúka!

Við þökkum aðstandendum Höfðatorgs kærlega fyrir að fá okkur í þetta skemmtilega verkefni.

—————-
Höfundur: Hanna Lilja Jónasdóttir

HSSR mannaði tvær vaktir í Hálendisvakt þetta sumar. Svæðið norðan Vatnajökuls varð fyrir valinu og var sveitin við störf á tímabilinu frá 27. júlí til 10. ágúst. Samtals tóku átta félagar þátt í Hálendisvakt að þessu sinni.
Verkefnin voru margbreytileg. Lindaáin við Herðubreiðarlindir var nokkuð fastur punktur í dagskrá fyrri vaktarinnar, en Jökulsá á Fjöllum flæddi töluvert oft yfir bakka sína og yfir í hana með tilheyrandi aukningu á vatnsmagni. Fjöldi annarra úrlausnarefna beið einnig björgunarfólks og má þar nefna vandamál tengd hjólbörðum, bremsukerfum, viftureimum og hverju því sem þarf að vera í lagi svo bíllinn gangi vel. Þá var vaktfólk til taks að aðstoða og leiðbeina ferðafólki um leiðarval og hefur sú aðstoð örugglega leitt af sér fækkun slysa og óhappa.
Akstur um svæðið er hluti af verkefnum Hálendisvaktar og var víða farið. Meðal annars voru Dyngjafjalla- og Gæsavatnaleiðir eknar með viðkomu í skálanum við Kistufell þegar púlsinn var tekinn á stöðunni á Sprengisandi. Farið var í Hvannalindir, Kverkfjöll og víðar, en líklega hefur vaktfólk ekið um 2.500 kílómetra á tímabilinu.
HSSR vill koma á framfæri innilegu þakklæti til skálavarða og landvarða sem vaktfólk komst í tæri við, en þeir voru ætíð ráðagóðir og fljótir til verka ef eitthvað bjátaði á. Þá var aðstaða björgunarfólks í Drekagili prýðileg. Einnig er rétt að geta þess að þjónustufólk á Mývatni sýndi mikla lipurð í viðleitni sinni til þess að koma ferðafólki í vanda til hjálpar. Fólk kemur sannarlega ekki að tómum kofunum þegar Mývetningar eru sóttir heim!
Og þá er rétt að geta þess að Björgunarsveitin Stefán fær sérstakar þakkir fyrir kærkomna aðstoð þegar mest lá við, en þar er hvert rúm skipað úrvals góðu fólki. Það var HSSR fólki t.d. mikið ánægjuefni að hitta tvo félaga sem flust hafa búferlum norður og gengið til liðs við þessa góðu björgunarsveit.
Hjálparsveit skáta í Reykjavík hefur staðið Hálendisvakt frá því að til hennar var stofnað og er engin ástæða til að ætla annað en að hún muni svara kallinu að ári. Í þessu verkefni sameinast tækifæri til þess að láta gott af sér leiða og til þess að kynnast betur þeim náttúruperlum sem hálendi Íslands hefur upp á að bjóða.

—————-
Texti m. mynd: Eygló, landvörður í Hvannalindum, bruggar te.
Höfundur: Ólafur Jón Jónsson

Léttsveit tók nýverið að sér að setja upp tryggingar á neðsta hluta gönguleiðarinnar á Kerhólakamb. Þessi hluti er á köflum brattur og getur reynst göngufólki erfiður yfirferðar. Í leiðinni var ákveðið að setja upp megintryggingar fyrir línuvinnu í aðgerðum, en á þessum kafla er lítið um góðar náttúrulegar tryggingar. Samtals fóru sex manns í þessa ferð, fimm frá HSSR ásamt fulltrúa landeigenda. Verkið tók eina kvöldstund og var það mat manna að vel hefði heppnast.
Það var byggingavöruverslunin BYKO sem lagði til allt efni í þetta verkefni og á það fyrirtæki góðar þakkir skildar fyrir.

—————-
Texti m. mynd: Mikið var spáð í spilin á fjalli
Höfundur: Ólafur Jón Jónsson

Félagar HSSR í hálendisgæslu norðan Vatnajökuls héldi hátíðlegan svokallaðan prinsessudag 5. ágúst. Ástæða þess var að þeir Óli Jón og Gunnar (Lambi) fagna samtals tæplega níræðis afmæli sinu á fjöllum. Þeim fannst við hæfi, komnir á þennan aldur og verandi í fersku fjallaloftinu að nefna daginn prinsessudag þeim til heiðurs.

—————-
Höfundur: Haukur Harðarson

Áhugasamt fólk sem hefur hug á að hefja þjálfun fyrir starf hjá HSSR getur tekið frá þriðjudagskvöld 4. september þegar nýliðastarf komandi vetrar verður kynnt. Þjálfun fyrir nýliða hjá HSSR tekur að öllu jöfnu eitt og hálft ár þannig að þeir sem hefja þjálfun núna í haust geta gengið inn í sveitina fyrri hluta árs 2014.

Nýliðaþjálfunin er fyrir alla sem hafa áhuga á að taka þátt í starfi björgunarsveitarinnar og gera ráð fyrir að geta tekið þátt í starfinu næstu árin. Miðað er við 18 ára lágmarksaldur þeirra sem hefja þjálfun.

Kynningarfundurinn verður sem fyrr segir þriðjudag 4. september og þjálfunin hefst viku seinna. Helgina 14. til 16. september er svo fyrsta stóra námskeiðið. Nánari dagskrá verður kynnt seinna.

—————-
Texti m. mynd: Það er gaman á fjallamennskunámskeiðum
Höfundur: Einar Ragnar Sigurðsson

HSSR fékk á vormánuðum í hendur styrk til búnaðarkaupa frá styrktarsjóði ISAVIA sem hugsaður var til þess að að styrkja viðbragð björgunarsveita í hópslysum. (sjá frétt neðar á síðu frá 11.maí 2012). HSSR fékk styrk að upphæð 350 þúsund og á stjórnarfundi var ákveðið að HSSR legði 150 þúsund til viðbótar við upphæðina. Ákveðið var að stýring á ráðstöfun væri í höndum sjúkrahóps.
Í sumar höfum við í sjúkrahóp endurnýjað sjúkratöskur í öllum bílunum, sem voru komnar til ára sinna og endurskipulagt búnaðinn. Keyptar voru 4 stórar töskur sem innihalda súrefniskút í tösku ásamt fylgihlutum og stóra sjúkratösku til að sinna ýmsum vandamálum allt frá smásárum upp í stærri blæðingar, bruna og brot. Í töskunum eru einnig bráðaflokkunartaska, hálskragar, blóðþrýstingsmælir, teppi og minni sérhæfður búnaður, ásamt reykbombu og neyðarblysum. Hugmyndin var að sameina allan neyðarbúnað sveitarinnar á einn stað í hvert farartæki og geta þá auðveldlega tekið hann með út í feltið til notkunnar í heild sinni, en einnig hægt að taka minni einingar úr töskunni til að létta burð ef ekki þarf eins stórt viðbragð. Töskurnar eru auk þess mjög hentugar til að flytja með björgunarmanni á vélsleða þar sem hægt er að breyta þeim í bakpoka.
Búnaðurinn verður vonandi fljótlega kynntur fyrir bílahóp og síðan fyrir öllum félögum á sveitarfundi strax í haust. Einnig er áætlað að búa til lítið kynningarskjal í máli og myndum hvernig búnaður er uppsettur og geta félagar þá kynnt sér málið. Mikilvægt er að þeir sem starfa með HSSR þekki vel til sjúrabúnaðar bæði uppsetningu og notkunn og átti sig þá betur á getu sinni til að takast á við fyrstu hjálp á vettvangi.
Við þökkum ISAVIA kærlega fyrir stuðninginn og óskum ykkur öllum til hamingju með nýjan sjúkrabúnað. Helgi og Katrín

—————-
Texti m. mynd: R4 ásamt nýjum sjúkrabúnaði
Höfundur: Helgi Þór Leifsson

Félagar HSSR hafa unnið að lagfærinum á gönguleiðum á Henglinum undafarna daga. Veðrið hefur leikið við þátttakendur verkefnisins og vel hefur gengið. Helstu verkefni eru að lagfæra og mála stikur. Þeir félagar sem hafa ekki mætt í þetta skemmtilega verkefni eru hvattir til að skrá sig.

—————-
Texti m. mynd: Vaskur hópur málara með Þingvallavatn í baksýn
Höfundur: Kristinn Ólafsson

Galvaskir félar gengu um hengilssvæðið í gærkvöldi og máluðu stikur á svartri gönguleið. Sem betur fer eru allir í þeim hópi ávallt viðbúnir og kom pensillinn sér vel í erfiðum aðstæðum!

—————-
Höfundur: Eiríkur Lárusson

Þann 19. júní var haldinn síðasti stjórnarfundur fyrir sumarfrí. Aðallega var fjallað um tvö mál, annarsvegar gerði laganefnd grein fyrir sínum tillögum sem lagðar verða inn í umræður á sveitarfundi i september og hins vegar bílakaup. Ákveðið var að kaupa stækka bílaflota sveitarinnar, kaupa einn 9 manna þjóðvegabíl til viðbótar en reyna á móti að draga úr notkun á breyttum jeppum. Markmiðið er að minnka kostnað við rekstur tækja.

Fyrir valinu var Ford Transit 350 M AWD Trend og er með læstum millikassa. Um er að ræða eftirársbíl, árgerð 2011 og verður hann klæddur að innan og sett í hann sæti í Póllandi. Heildarkostnaður við bílinn verður um 7 milljónir króna og þá er gert ráð fyrir að hann sé tilbúin til notkunar með öllum tækjum og talstöðvum. Hann verður líklega tilbúin til notkunar í október. Myndin hér til hliðar er af sambærilegum bíl en eftir að fjölga gluggum og setja í hann sæti.

—————-
Texti m. mynd: Ekki alveg eins en næstum því
Höfundur: Haukur Harðarson

Nokkrar hressar konur lögðu af stað í rúmlega sexhundrað og fimmtíu kílómetra gönguferð nú rétt fyrir kvöldmat. Þær ætla að ganga landshorna á milli, frá Hornströndum til Austfjarða. Leiðin er um 650 kílómetrar og stefna þær á að ljúka ferðinni á fjórum til fimm vikum.
Að sjálsögðu á Hjálparsveit skáta í Reykjavík sinn fulltrúa í hópnum en það er Sigrún Hallgrímsdóttir sem starfar með bækistövarhóp og Eftirbátum.

—————-
Höfundur: Haukur Harðarson