Nýliðaraun HSSR var haldin á laugardaginn. Sleðaflokkur HSSR hefur undanfarin ár séð um framkvæmdina og var engin breyting á því þó svo að 7 félagar sleðaflokksins væru í æfingarferð í Hvanngili um helgina enda flokkurinn vel mannaður um þessar mundir og starfið kröftugt. Í Nýliðarauninni taka félagar í Nýliðum 2 þátt og er þetta útkallsæfing þar sem reynir á flest það sem þau hafa lært undafarin tvö ár. Upp úr klukkan fjögur voru Nýliðarnir píptir út og mættu þeir á M6 þar sem fyrsta verkefnið beið en það var leitarverkefni í Elliðaárdal. Ekki tók langan tíma að klára það verkefni enda allir með fræðin á hreinu. Því næst var haldið í Skálafell en þar höfðu félagar í sleðaflokk útbúið nokkur verkefni m.a. tvö snjóflóð. Nýliðarnir leystu öll þau verkefni sem voru lögð fyrir þá af stakri prýði og er ekki annað að sjá en það sé öflugur hópur á leiðinni í HSSR á næstu misserum. Sleðahópurinn þakkar öllum þeim sem lögðu hönd á plóginn við undirbúning og framkvæmd æfingarinnar.

Myndir komnar í myndaalbúmið!

—————-
Höfundur: Kristinn Ólafsson

Þann 23. febrúar var haldinn stefnumótunarfundur fyrir Íslensku alþjóðasvetina í Kópavogi. Fundurinn var opinn öllum félögum SL og voru um 60 einstaklingar mættir, þar af 12 af þeim frá HSSR. Öll mál voru undir en sérstaklega var horft til framtíðar, verkefna og skipulags. Góð kvöldstund en niðurstaðan unninn frekar af fulltrúaráði ÍA, stýrihóp og stjórnendum. Síðan er gert ráð fyrir að niðurstaðan verði lögð fyrir stjórn SL um miðjan mars.

—————-
Höfundur: Haukur Harðarson

Skrifað hefur verið undir nýjan samning við Orkuveitu Reykjavíkur um „Viðhald merktra gönguleiða á Hengilssvæðinu 2012. Umfang verksins eykst nokkur frá sumrinu 2011 en þá var það skorið niður um helming. Skipulag vinnunnar verðum með svipuðum hætti og undanfarin sumur og miðast við að ljúka sem mestu áður en félagar sveitarinnar fara almennt í sumarfrí. Félagar HSSR geta því farið að hlakka til sumarsins og skemmtilegrar málningarvinnu á björtum sumarkvöldum í fjallakyrrð.

—————-
Höfundur: Gunnlaugur Briem

Fimmtudagskvöldið 23, febrúar er fræðslukvöld sjúkrahóps og að þessu sinni er það börur Fjallað verður um börur og böruburð, margar gerðir kynntar og æft sig í að nota þær. Og… vita hvar þær eru staðsettar! Eitthvað sem allir ættu að kynna sér.

Í næstu viku verður svo hópstjóranámskeið, tvö kvöld, ætlað hópstjórum og þeim sem hafa hug á að verða hópstjórar í útköllum. Námskeið er aðeins fyrir fullgilda félaga og þegar eru 26 skráðir á D4H.

—————-
Höfundur: Haukur Harðarson

Fyrsti árlegi Stóri dagur HSSR fór fram nú um helgina en um fjörtíu sveitarmeðlimir og nýliðar komu að honum að þessu sinni.

Boðið var upp á fimm stöðvar með ýmsum hjálparsveitartengdum verkefnum. Meginstefin voru þar böruburður, rötun, ýlaleit, línubrú, klifur og sig en verkefnin voru auk þess krydduð með alls kyns spurningum og þrautum. Liðin söfnuðu svo stjörnum í svo til gert vegabréf eftir því hvernig þeim reið af að leysa úr því sem fyrir þau var lagt.

Þátt tóku fimm lið og stóðu sig öll með einstakri prýði. Tvö lið sköruðu þó fram úr: Skytturnar þrjár með 120 stjörnur og Þrombinn með 122.

Að þrautunum loknum skelltu herramennirnir í Eriku upp grillveislu mikilli og snæddu þáttakendur þar dýrindis máltíð, þreyttir en kátir eftir góðan dag. Skipulagningsnefnd þakkar öllum sem þátt tóku fyrir einstaklega ánægjulegan dag og hlakkar til að taka þátt í deginum að ári.

Heildarniðurstöður voru sem hér segir:

78 stjörnur (missti af einni þraut): Besti flokkurinn
Elísabet Margeirsdóttir, Erna Knútsdóttir og Inga Hrönn Ásgeirsdóttir

93 stjörnur: Leigubíllinn
Anna Ágústsdóttir, Benedikt Rafnsson og Charlotte Huber

98 stjörnur: Stjörnurnar
Arngrímur Einarsson, Erla María Hauksdóttir og Jóhanna Jónsdóttir

120 stjörnur: Skytturnar 3
Guðjón H. Kristinsson, Daníel Másson og Hulda Margrét Hauksdóttir

122 stjörnur: Þrombinn
Ingveldur Ævarsdóttir, Katrín Möller, Sigurbjörg Erla Egilsdóttir, og Þórey Rósa Einarsdóttir

—————-
Höfundur: Martin Swift

Nú í kvöld var snjóflóðaæfing haldin fyrir undanfara og vélsleða menn á svæði 1. Æfingin var haldin austan megin í Bláfjöllum þar sem tvö flóð höfðu fallið. Þrír menn voru grafnir í öðru og einn í hinu. Einnig var annað flóð í Draumadals gili þar sem tveir voru grafnir. Undanfarar Hssr héldu æfinguna og teljum við hana hafa gengið mjög vel. Æfingin reyndi gríðarlega á stjórnun og skipulag björgunarmanna og notkun vélsleða við að flytja björgunarmenn á flóða svæðin. Aðstæður voru mjög raunverulegar þar sem það fristi seinni part dags og gerði björgunarmönnum erfitt fyrir að leyta í flóðunum.

—————-
Höfundur: Daníel Guðmundsson

Um síðustu helgi var Sleðamessa Slysavarnarfélagsins Landsbjargar haldinn í Eyjafirði. 4 félagar úr HSSR fóru norður og hittu þar þann fimmta, Kalla Eiríks svæðisstjóra HSSR í Eyjafirði.

Á laugardeginum komu saman 40 sleðamenn víðsvegar af landinu og héldu á Ólafsfjörð þar sem félgar úr Súlum á Akureyri, Tindi á Ólafsfirði og Strákum á Siglufirði leiddu sleðamenn í æfingum í fjalllendinu á utanverðum Tröllaskaga.

Á sunnudag var haldið á Grenivík og ekið um Grenjárdal, Trölladal og að skálanum Gili ásamt félögum úr HSG og Kyndli í Mosfellsbæ.

Sleðahópur HSSR þakkar þeim félögum sem mættu og sérstaklega þeim sem stóðu að undirbúningi fyrir frábæra helgi

—————-
Texti m. mynd: Sveinbjörn í “Rassmussen æfingum”
Höfundur: Baldur Gunnarsson

Sérhæfður leitarhópur bíður öðrum HSSR félögum til tveggja kvölda snjóflóðaupprifjunar og æfingar núna í vikunni.
Á miðvikudag verður messað inni á M6 og hefst messan kl. 19.00.
Þar munum við gera okkur grein fyrir gerðum snjóflóða, hvað myndar snjóflóðahættu, hvað ber að varast og hvernig skuli velja leiðir.
Einnig rifjum við upp hvernig við notum snjóflóðaýla, stangir og hvernig best er að standa að uppgreftri fórnarlamba.

Á fimmtudag verður verkleg útiæfing og þá er mæting á M6 kl. 18.00 og brottför skömmu síðar.
Allir þátttakendur skulu vera með ýli, skóflu og stöng og útbúnir til ca 4 klst útivistar.

Skráning fyrir miðvikudag:https://hssr.d4h.org/team/events/view/33176
Skráning fyrir fimmtudag:https://hssr.d4h.org/team/exercises/view/33178

Fyrirlesari verður undirritaður en útiæfingin verður í umsjón Leitarhóps.

—————-
Höfundur: Hlynur Skagfjörð Pálsson

Nýlega var var gengið frá endurnýjun á tryggingasamning SL fyrir hönd aðildareininga og Sjóvá. Helstu breytingar í samningnum eru að bótafjárhæðir voru hækkaðar, biðtími eftir bótum styttur úr 12 vikum í 4, en á móti kemur að bótatímabilið sem bætur eru greiddar var stytt. Það er nú 104 vikur sem gera tvö ár.

Búið er að endurnýja yfirlit HSSR yfir tryggingar og er það að finna hér á heimasíðunni í gögnum. Þar koma fram helstu upplýsinar um tryggingar félaga, hvenær þeir eru tryggðir og upphæðir m.v. janúar 2012 og þær viðbótartryggingar sem HSSR kaupir.

—————-
Höfundur: Haukur Harðarson

Þriðjudaginn 17. janúar funduðu stjórnendur útkallshópa og stjórn. Tilgangur fundarinns var að upplýsa og fá umræðu um ýmiss mál sem eru í vinnslu hjá stjórn. Meðal annars var rætt um:

D4H og rafræn skráning inn og úr útköllum. Það verður lögð áhersla á D4H þetta starfsár, þar mun öll dagskrá farar inn auk félagatals. Hópstjórar og hópar hvattir til að nota kerfið en á móti verður ákveðnum þátttum svo sem dagskrá lokað á heimasíðu.Námskeið fyrir hópstjóra í útköllum verður haldið í febrúar. Það verður innasveitarnámskeið þ.e. ekki á vegum Björgunarskólanns og áhersla á að deila reynslu sem er innan HSSR, hlutverk hópstjóra í útköllum, vinnuferla o.s.fr. Markhópurinn eru núverandi hópstjórar og einstaklingar með útkallsreynslu sem gætu orðið hópstjórar.Gátlistar í útköllum. Kynntar hugmyndir um uppsettningu á gátlistum í útköllum og markmið með þeim er að auðveldara verði að tryggja að réttur búnaður sé tekin með eftir eðli útkalla. Næsta skref er að listarnir fara í vinnslu innan útkallshópa.Þrif á húsnæði. Útkallshópar munu í auknu mæli taka að sér þrif á húsnæði og gert ráð fyrir að hver hópur taki einn mánuð á ári. Kerfið byrjar í janúar og það er búðahópur sem á fyrstu törn. Nánari upplýsingar á M6Afmælisár. Við erum 80 ára og það er fullt af góðum hugmyndum svo sem fjölskyldudagur, æfingar og ferðir að ógleymdri veglegri árshátíð. Villi og Óli Jón voru fengnir til að halda utan um árið. Takk fyrir góðan fund – stjórn HSSR

—————-
Höfundur: Haukur Harðarson