Fimm fræknir félagar Hjálparsveitar skáta í Reykjavík lögðu land undir fót í síðustu viku. Að þessu sinni var ferð þeirra heitið á Gufuskála þar sem námskeiðið "Fyrsta hjálp í óbyggðum" (WFR) fór fram.
Fjölmenningarlegt samfélag myndaðist þar sem fjallaleiðsögumenn, nemendur í leiðsöguskólanum og björgunarsveitarfólk frá allri landsbyggðinni komu saman og lærðu um það sem hafa þarf í huga og hvaða reglum þarf að fylgja þegar óhöpp verða í óbyggðum. Námkeiðið samanstóð af frábærum fyrirlestrum og enn betri verklegum æfingum undir handleiðslu reyndra sjúkraflutningamanna sem eiga heiður skilið fyrir þekkingu sína, áhuga og þolinmæði.
Vikan gekk með eindæmum vel og að sjálfsögðu stóðust allir prófin með glæsibrag og voru sveitinni til sóma.
Örvæntið ekki kæru félagar, þið eruð í öruggum höndum ef wúfer (Wilderness First Responder) er með í fjalla-för.
Meðfylgjandi er mynd af fararskjótanum sem vakti töluverða og verðskuldaða athygli á þjóðveginum. Sjúkrabörum var tryggilega komið fyrir á toppnum og þær fylltar af vatnsheldum duffelum og gönguskíðum.
—————-
Texti m. mynd: Unnið að vagúmpökkun.
Höfundur: Sigríður Guðrún Elíasdóttir
