Monthly Archives: June 2013

Hálendisvakt 2013

Á morgun halda fyrstu hópar til starfa á hálendisvakt björgunarsveita en hún mun standa út ágúst mánuð. Einnig ætlar fjöldi sjálfboðaliða að standa vaktina á ÓB og Olís stöðvum víða um landið og afhenda fræðsluefni og hvetja til ábyrgra ferðalaga í sumar.

Stuðið hefst kl. 16 og vaktin verður staðin til 20 eða svo lengi sem birgðir endast. Ferðalöngum verða afhentir litlir pokar sem má nota sem ruslapoka í bílinn. Í þeim verður Safetravel harmonikuspjald, 112 póstkort, bæklingur frá Sjóvá, framrúðuplástur og TRYGGJÓ 🙂

Pokanum fylgja svo góð ráð ef óskað er eftir og hvatning til ábyrgra ferðalaga í sumar. Þetta hefur tekist vel síðustu árin og vonandi verður svo líka núna.

Olís mun bjóða afslátt af eldsneyti auk þess sem hluti innkomu rennur til félagsins. Þeir munu auglýsa daginn vel og verða m.a. með netleik þar sem spurt verður um undirbúninga ferðalaga. Sjóvá verður með prentauglýsingar og auglýsingar i útvarpi og við vonumst til að detta inn í sem flesta fjölmiðla.

Klukkan 16:30 leggja fyrstu hópar af stað til fjalla frá Olís í Norðlingaholti og munu formaður félagsins og framkvæmdastjóri fylgja þeim fyrstu metrana. Þangað verður einnig stefnt fjölmiðlamönnum en einnig verða staðarmiðlar hvattir til að heimsækja stöðvar í sínu héraði.

HSSR tekur sem áður þátt í Hálendisvaktinni og munu tveir hópar frá okkur manna stöðvar Norðan Vatnajökuls og á Fjallabak sitthvora helgina í kringum verslunarmannahelgi.

WOW Cyclothon 2013

Þessa dagana fer fram hjólreiðakeppnin WOW Cyclothon, en þar er hjólað “hringinn” í miðnætursólinni.

HSSR á fjóra fulltrúa í fleiri en einu liði, en þar eru Benedikt Ingi Tómasson, Kjartan Þór Þorbjörnsson, Steinar Þorbjörnsson og Stefán Örn Kristjánsson.

Barnaheill – Save the Children á Íslandi eru frjáls félagasamtök sem vinna að mannréttindum barna með því að vera málsvari þeirra, með fræðslustarfi, innlendum og erlendum verkefnum og í gegnum neyðaraðstoð.
Helstu áherslur Barnaheilla er að standa vörð um réttindi barna, baráttu gegn ofbeldi á börnum, heilbrigðismál og að rödd barna heyrist betur í íslensku samfélagi.

Hægt er að fylgjast með stöðu keppenda á þessari síðu.

Tenglar á áheita og upplýsingasíður liðanna:
BikeCompany
Össur Racing

Samningur HSSR við Orkuveituna

Belinda Eir og Tommi gjadkeri handsala samning sumarsins.

Belinda Eir og Tommi gjaldkeri handsala samning sumarsins.

Nú í morgun var skrifað undir samning HSSR og Orkuveitu Reykjavíkur um viðhald gönguleiðakerfis OR á Hengilssvæðinu. Þetta er tíunda árið í röð sem að HSSR sinnir þessu verkefni fyrir OR og hefur samstarfið gefist vel fyrir báða aðila. Þrátt fyrir að samningur hafi ekki verið undirritaður fyrr en í morgun hafa HSSR félagar þó þegar hafið störf á svæðinu. Sumarbyrjunin hefur reyndar verið bæði köld og vætusöm og því viðbúið að verkefnið teygist eitthvað lengra fram á sumarið en undanfarin ár.

Nú er um að gera að sitja um góðu dagana og nýta þá vel á Hengilssvæðinu.

HSSR konur bjarga deginum!

Inga og Björg

Þann 12. júní sl. kl. 12:22 barst útkall F1 Rauður vegna slyss í fjalllendi, en tilkynnt hafði verið um einstakling í vanda á Esjunni. Félagar í HSSR brugðust hratt við og tóku tólf þeirra beinan þátt í aðgerðinni í tveimur hópum sem héldu strax áleiðis á vettvang.

Meðal þeirra sem móttóku útkallið voru Björg Guðmundsdóttir og Ingibjörg Markúsdóttir sem fengu réttindi sem fullgildir björgunarmenn í HSSR í vor. Þær voru í venjubundinni heilsubótargöngu á leiðinni upp að Þverfellshorni og voru komnar rúmlega hálfa leið þegar kallið barst. Brugðust þær skjótt við og hlupu við fót áleiðis upp fjallið þar til þær komu á vettvang. Þegar þangað var komið tóku þær strax yfir formlega stjórn og deildu svo með sér verkum. Björg, sem er starfandi hjúkrunarfræðingur, hóf strax að sinna þolandanum og Ingibjörg setti sig í samband við Neyðarlínu til þess að koma á framfæri upplýsingum um framgang á vettvangi. Eftir góða aðhlynningu braggaðist þolandinn sæmilega og gat fljótlega staðið upp. Mátu björgunarkonurnar stöðuna þannig að þær myndu aðstoða hann við að koma sér niður af fjallinu og var hópurinn farinn af stað þegar þyrlusveit Gæslunnar bar að. Þá fóru björgunarkonurnar í þann ham að gera þolandann kláran til flutnings og að taka á móti sigmanni. Gekk sú aðgerð hratt og greiðlega fyrir sig og komst þolandinn fljótt á sjúkrahús.

Félagi í svæðisstjórn á svæði 1 lauk lofsorði á aðkomu okkar kvenna og sagði að viðbrögð þeirra hefðu verið rétt og hefðu þær m.a. komið fljótt á framfæri réttum upplýsingum um staðsetningu vettvangs.

Það er gaman að greina frá því að þetta er í annað skiptið sem Ingibjörg er fyrst björgunarfólks á vettvang á Esjunni því í vetur lenti hún í álíka kringumstæðum. Því er ljóst að það eru töggur í nýjustu liðsmönnum Hjálparsveitar skáta í Reykjavík!

Landsþing Landsbjargar

Haukur tekur við nýjum kortagrunni frá Marteini S. á Landsþinginu á Akureyri

Landsþing Slysavarnafélagsins Landsbjargar var haldið á Akureyri fyrir stuttu. Þetta var nokkuð friðsælt þing, farið var yfir skýrslu stjórnar, reikninga og unnið var með framtíðarsýn. Það var ánægjulegt að sjá að jafnvægi virðist vera að komast á rekstur þrátt fyrir minnkandi tekjur. Stjórn var að mestu endurkjörinn, Hörður Már verður formaður áfram en nýliðar í stjórn eru Leonard Birgisson frá Súlum Akureyri og Þorvaldur Friðrik Hallsson Ársæl Reykjavík. Fulltrúar stjórnar HSSR á þinginu voru Kristjón, Sigþóra, Þorbjörg og Haukur. Auk þess tók lið frá okkur þátt í Björgunarleikunum og stóð sig vel. Einnig tókum við þátt í blönduðu liði.

Continue reading →

Útkall F2 gulur, leit á Vestfjörðum

Aðfaranótt laugardagsins 1. júní barst sveitinni ósk um aðstoð vegna leitar að franskri konu í Mjóafirði við Ísafjarðardjúp. Í fyrstu var óskað eftir sérhæfðum leitarmönnum en síðar breyttist boðun í heildarútkall.

Frá HSSR fór einn hópur göngumanna vestur fyrir hádegi. Eftir kvöldmat fór Reykur 1 með tvo gönguhópa til viðbótar og félaga með leitarhund og búðatjaldið. Alls komu 25 manns frá HSSR að leitinni. Um þriðjungur þeirra tók líka þátt í fótboltagæslu fyrr um daginn en leitin féll saman við gæslu sem sveitin annaðist á landsleik kvenna í knattspyrnu, Ísland – Skotland.

Landssöfnun Landsbjargar

Í gær, föstudag, var haldin landssöfnun fyrir Landsbjörgu þar sem meðal annars var safnað í Bakvarðasveit félagsins. Meðlimir HSSR stóðu vaktina, hvort tveggja í innhringiverinu og uppi við Búhamra þar sem fjallabjörgunarhluti útsendingarinnar fór fram.

Búðahópur setti upp tjaldið við stjórnstöðvarbíl Svæðisstjórnar, Björninn, og fjallahópur hélt upp í hamrana þar sem sett var upp kerfi til að slaka þolanda niður klettana.

Allt gekk að óskum og veðrið spilaði með, hellidembunni sem spáð var stytti upp svo samræmi var milli beinu útsendingarinnar og uppfylliefnisins sem tekið var upp um miðjan mánuðinn.

Continue reading →