Félagar í ÍA við störf sín í æfingunni MODEX 2013 sem haldin var í Danmörku í janúar 2013.

Íslenska alþjóðasveitin er nú stödd á æfingu í Danmörku. Aðstaða til að æfa rústabjörgun er með besta móti, en æfingasvæðið hefur verið sett upp eins og um bæ sé að ræða. Alls fóru 45 félagar með sveitinni en hún samanstendur af rústabjörgunarmönnum, læknum, bráðatæknum, samhæfingarhópi, skyndihjálparmönnum, fjarskiptahóp, búðahóp, stjórnendum og félögum úr hundabjörgunarsveit. Þar af eru níu félagar HSSR.

Verkefnið sem er verið að leysa er björgun eftir jarðskjálfta af stærðargráðunni 8,1 á Richter og flóðbylgju í kjölfarið sem hefur haft mikil áhrif í hinu ímyndaða Eulandi. Íslenska alþjóðasveitin hefur farið í gegnum alla þá þætti sem gerast í venjulegu útkalli, svo sem undirbúningi, ferð út, tollskoðun,  uppsetningu móttökustöðvar fyrir erlendar sveitir á leið inn í landið, uppsetningu búða og ekki síst björgun úr rústum. Þegar þetta er skrifað hefur 17 sjúklingum verið bjargað úr rústunum af íslenska björgunarfólkinu.

Sumir hafa verið fluttir á Field Hospital sem er rekinn af tékkneskri sveit lækna og hjúkrunarfræðinga sem einnig taka þátt í æfingunni en auk þess er hér bresk rústabjörgunarsveit að æfa. Aðstæður eru því mjög raunverulegar og gagnast sveitinni mjög vel í að auka færni sína. Síðustu fjóra tíma hefur snjóað og það er kalt úti sem gerir verkefnið allt mjög krefjandi. Fólk þarf að hafa fyrir því að halda á sér hita hvort sem það er úti að vinna eða í hvíld ofan í svefnpoka. Allt gengur þó vel og andinn í hópnum góður.

Reykur 7, Ford Transit bifreið HSSR.

Mánudaginn 28. janúar verður “opið” hús hjá HSSR. Við erum búin að fá óskir frá öðrum sveitum um að skoða rafræna svörum í útköllum og nýjan bíl sem við vorum að taka í notkun. Því ákváðum við að slá þessu saman auk þess sem alltaf skemmtilegt að fá félaga í heimsókn. Þetta verður allt á óformlegu nótunum, við verðum á staðnum frá kl. 19.00 til 21.30 og lengur ef áhugi er fyrir því. Líklega höfðar þetta mest til tækja og bækistöðvarhópa auk stjórnarmanna í öðrum einingum en allir áhugasamir eru velkomnir.

Meðal þess sem hægt verður að sjá:

• Nýjan bíl sem við vorum að taka í notkun. Þar er um að ræða Ford Transit, 9 manna bíl sem fluttur var inn í gegnum Bílaleigu Akureyrar en breytt í Póllandi. Bíllinn er eftirársbíll og tiltölulega ódýr kostur.
• Rafrænt kerfi sem við notum við svörun útkalla og til að auðvelda bækistöðvarhóp að fá yfirlit yfir stöðu, röðun í hópa og gefa upplýsingar til þeirra sem mæta í útkallið. Kerfið hefur verið kynnt í tímaritinu Björgun.
• D4H kerfið (utanumhald, dagskrá, útköll, mætingar). Kerfi sem nokkuð margar sveitir hafa tekið í notkun en nú er komin tæplega tveggja ára reynsla hjá okkur á það og við höfum ákveðið að nýta það áfram.
• Einnig verða Polaris sleðar sem eru að komast á snjó á staðnum.

Kaffi á könnunni og nammi sem ekki kláraðist í flugeldasölunni. Tækjahópar, bækistöðvarhópur og stjórnarmenn verða á staðnum

Stjórn HSSR

Leiðin sem farin var í ferð vélsleðahóps í janúar 2013.

Ferðin í gær gékk vel þrátt fyrir lítinn snjó og mikinn ís. Tekið var af við Sigöldu og ekið eftir veginum í gegnum hraunið þar sem var mikill ís og stórir pollar inn á milli. Brunað var framhjá Höllinni og stoppað stutt við Glaðheima. Þaðan var ekið um Grænalón og vestan Kattarhryggja, en þar tók Stubburinn upp gamla siði og fór að ganga illa. Skildu því leiðir og héldum við fjórir áfram á meðan hinir brösuðu við sleðana.

Veðurstöðin sem gera þurfti við er staðsett við Lónakvísl skammt frá Botlangatjörn. Vindrella á stöðinni var löskuð og þurfti því að fella 10m. mastur til að skipta henni út og einnig var skipt um vigt í úrkomumæli. Þegar við komum aftur til baka voru strákarnir enn að brasa við sleðann og var því ekkert annað að gera en að draga sleðann. Þegar búið var að draga sleðan daggóðan spöl var reynt að gangsetja og komst sleðinn fyrir eiginn vélarafli niður að bíl.

Þetta var fyrsti túrinn á nýja sleðanum og reyndist hann mjög vel og þar kom berlega í ljós hvað hann er góður á svelli enda eru ansi mörg kíló af nöglum í beltinu.