Category Archives: Frá félögum

Þetta eru ferðasögur og hvaðeina sem félagar birta upp á sitt einsdæmi.

Pakistan – undirbúningur á fullu!!

Þá er heldur betur farið að styttast í ferð undirritaðs, Helga og Hálfdánar til Pakistan. Brottför er 27. júní. Lokaundirbúningur er hafinn og kominn veláleiðis.

Við erum búnir að koma okkur upp litla leiðangurssíðu sem við munum halda við eins og við getum á meðan ferð okkar stendur. Kíkið endilega á hana!

—————-
Vefslóð: alpaklifur.blogspot.com
Texti m. mynd: Punji Peak (5800m) í Hindu Raj fjallgarðinum
Höfundur: Stefán Örn Kristjánsson

PÚÐURKERLINGAR

Nokkrir félagar úr HSSR taka þessa dagana þátt í vorleiðangri Jöklarannsókanrfélagsins á Vatnajökli. Í dag (sunnudag) var ma. unnið við sprengimælingar á Grímsvatnagígnum frá haustinu 2004. Fremstar meðal jafninga eru “púðurkerlingarnar” úr nýliðaflokki HSSR Hrafnhildur og Hanna Kata.

—————-
Höfundur: Ragnar Rúnar Svavarsson

Ber er hver að baki nema sér Bola eigi.

Frétt 27.maí

Nú líður að lokum leiðangursins og er hann staddur í Esjufjallaskála, ja, nema þeir sem ætluðu að skíða styttri leiðina. Fossadalur reyndist ófær og eru skíðamenn nú að puða upp 5oo m háa snjóbrekku þar sem bílar bíða þeirra. Það er eins gott að brekkan hafi verið þess virði.
Í dag var Snókur klifinn, brotinn stýristjakkur, legið í sólbaði, sagðar sögur og, auðvitað er verið að grilla í lok ferðar. Búinn að vera frábær túr í alla staði.

Leiðangursstjórn.

—————-
Höfundur: Ragnar Rúnar Svavarsson

Sumri heilsað

Þrír hressir, en fjölskyldulausir, garpar skelltu sér í eiginn leiðangur á dögunum. Undanfarinn Hálfdán með tvo búðinga, þau Gulla og Hrafnhildi, sér við hlið, fóru á Snæfellsjökul að heilsa nýju sumri. Veðrið var kannski ekki eins og best verður á kosið, t.a.m. voru leiðangursmenn ekki vissir hvaða toppur var klifinn. Var skíðað og gengið til skiptis eftir smag og behag. Nokkrar myndir komnar á myndasíðuna.

—————-
Texti m. mynd: Paa topptur
Höfundur: Hálfdán Ágústsson

Fallegt á fjöllum

Við Palli fórum í góða æfingaferð s.l. laugardag um N-Fjallabak. Lagt var af stað úr bænum kl. 7 á laugardagsmorgun og komið heim um kvöldið eftir frábæran dag. Veðrið var gott og færið einnig. Frábær dagur. Sjá má myndir í myndasafni.

—————-
Texti m. mynd: Strútur og Mýrdalsjökull
Höfundur: Helga Garðarsdóttir

Skessuhorn 22. janúar 2006

Fórum í nokk fjölmenna ferð á Skessuhorn í Skarðsheiði í gær.
Vorum þrír undanfarar í reyndari kantinum: Siggi Tommi, Robbi og Hálfdán, allir saman hoknir af reynslu. Gripum með okkur nokkra nýliða 1: Hrafnhildi, Hönnu Kötu, Gulla, Eriku og Írisi. Einnig voru tvær kúluvambar í samfloti með okkur: Björgvin úr Ársæli og Skabbi sem ekki vill láta kenna sig við einhverja olíuheila hjálparsveit. Tveir aðrir kunningjar okkar, Ágúst úr HSG og Skyler frá Kanahernum voru enn fremur nokkrum tímum á undan okkur á Hornið.

Eftir hreint út sagt ótrúlega yndislegt vel rúmlega tveggja tíma þjark eftir hálffrosnum móum Skarðsheiðarsvæðisins komum við að Skessuhorninu. Fórum við hefðbundnu leiðina upp NA-hrygginn, sem er tiltölulega þægilegt 1.-2. gráðu ís- og snjóklifur. Klifrið fór mis vel í menn enda leiðin mjög hressandi “exposed” og veðrir allt frá því að vera rjómablíða yfir í fárviðris hviður sem fleygðu mönnum flötum í haglregni úr öllum áttum. Ferðin upp gekk þokkalega hratt fyrir sig enda allir vel búnir, undir tryggri leiðsögn og klifrið ekki neinum ofviða þrátt fyrir litla reynslu af ístólanotkun.

Af toppnum var gegnið yfir í Katlaklauf og niður gönguleiðina á Skessuhornið. Á leiðinni yfir í Klaufina var ofsarok og haglél og fór svo illa að einn nýliðinn hrasaði og dró með sér næsta mann fyrir ofan á línunni. Kennslan á Fjallamennsku 1 hefur greinilega skilað sínu því stöllurnar náðu að bremsa sig fimlega með ísöxinni á “nó-tæm”.
Ferðin niður gekk annars vel og var nestað í heimsins stærstu snjóhúsum, sem HSSK útbjó sérstaklega handa okkur á námskeiði þessa sömu helgi. Þökkum við þeim kærlega fyrir en bendum á að næst þegar þau verða fengin til verktöku af þessu tagi að hafa gólfflötinn ofan við opið og lofthæðina ívið meiri… 🙂

—————-
Vefslóð: hssr.is/adminimages/myndir.asp?flokkur=155
Texti m. mynd: Gulli, Hanna Kata og Hrafhildur á NA-hryggnum.
Höfundur: Sigurður Tómas Þórisson

Hellaferð í kvöld!

Í kvöld ætla Sprettirnir að standa fyrir hellaferð. Farið verður í Arnarker í Leitarhrauni og er brottför frá M6 kl. 20:00 stundvíslega. Allir velkomnir. Nauðsynlegur búnaður; ljós, hjálmur, hanskar og skrið- og skítþolinn hlífðarfatnaður.
Arnarker er fallegur hraunrásarhellir með ágætu aðgengi, þó má gera ráð fyrir því að nokkur ís sé kominn í hann á þessum árstíma.

—————-
Texti m. mynd: úr Arnarkeri. Hellarannsóknafélagið, www.speleo.is
Höfundur: Gunnar Kr. Björgvinsson