Vegna veðurs var 13 tilvonandi Hnúksförum snúið norður í Eyjafjörð.
Þar kleif hópurinn hæsta fjall Norðurlands, Kerlingu (1536m) ásamt Hverfanda, Þríklakka, Stórakrumma, Litlakrumma, Bónda og Súlur.
Alls voru gengnir 23 km, hækkun um 2800m og tók ferðin í heildina 12,5 klst.

Aðstæður voru talsvert krefjandi; brattar skriður og snjóbrekkur, klungur og brölt.
Einnig eru miklar snjóaleysingar á svæðinu og urðum við vör við nokkur smáflóð á leið okkar.
Tekinn var prófíll til að meta aðstæður en hætta talin óveruleg.
Lítið smáflóð féll þó á gönguleið okkar þegar farið var niður af Kerlingu…sem var góð áminning um hversu mikilvæg
"hin heilaga þrenning" er við þessháttar aðstæður.

Í alla staði velheppnuð ferði í brakandi blíðu á Norðurlandinu.

—————-
Texti m. mynd: Hópurinn með Kerlingu í baksýn
Höfundur: Melkorka Jónsdóttir

Tveir nýir félagar bættust við í hóp fullgildra björgunarsveitarmanna HSSR á stjórnarfundi 22. maí síðastliðinn. Það voru feðgarnir Sindri Stefánsson og Stefán Ingi Hermannsson sem hófu þjálfun haustið 2010. Þá eru alls 18 fullgildir félagar búnir að bætast við frá áramótum.

—————-
Texti m. mynd: Haukur, Sindri og Stefán við inngönguna
Höfundur: Einar Ragnar Sigurðsson

Búðahópur HSSR efndi til stórrar æfingar að kvöldi þriðjudagsins 29. maí sl. þar sem haldið var á grasflatir í Elliðaárdalnum og búðum slegið upp. Öllu var bókstaflega tjaldað sem til var og voru þátttakendur sammála um að æfingin hefði gengið vel.
Í heildina fóru upp 13 vinnu-, birgða- og svefntjöld með vinnu- og svefnaðstöðu fyrir 40 manna sveit. Búðirnar voru standsettar með rafmagni í öllum vinnutjöldum og voru þær því fyllilega starfhæfar og tilbúnar til notkunar.
Búðahópur er hluti af Íslensku alþjóðasveitinni og sér um rekstur búða fyrir hana í útköllum. Í hópnum eru um 25 manns og þar af starfa 10 beint með ÍA.

—————-
Texti m. mynd: Glæsilegar búðir í Elliðaárdal
Höfundur: Ólafur Jón Jónsson

Frímann og Einar Ragnar hafa tekið að sér að sjá um nýliðastarfið næsta vetur og eru komnir af stað með undirbúning. Gert er ráð fyrir nokkuð hefðbundnu starfi en þó eru alltaf einherjar áherslubreytingar. Bæklingur til að kynna nýliðastarfið verður gefinn út og kynningarfundur haldinn í byrjun september að vanda.

—————-
Texti m. mynd: Alltaf gaman hjá nýliðum… og leiðbeinendum…
Höfundur: Einar Ragnar Sigurðsson

Um síðastliðin mánaðarmót var þriðji HSSR félaginn á UNDAC námskeiði í Sviss. UNDAC er samhæfingarteymi Sameinuðu þjóðanna vegna náttúruhamfarir og skyndilegrar vá.

Í dag eru þrír virkir UNDAC liðar, Sólveig Þorvaldsdóttir HSSK, Víðir Reynisson og Ólafur Loftsson HSSR og innan skamms bætist Hilmar Már HSSR í hópinn.

Nánari upplýsingar um UNDAC (The United Nations Disaster Assessment and Coordination) má finna hér.

—————-
Texti m. mynd: 37 manna hópur UNDAC liða í Genf
Höfundur: Hilmar Már Aðalsteinsson

Búðahópur Hjálparsveitar skáta í Reykjavík festi nýverið kaup á 5kW Herkules eins og þriggja fasa ljósavél sem gengur fyrir diesel eldsneyti. Vélin er flokkuð sem hljóðlát og mun því henta vel til þess að knýja búðir sveitarinnar og þá sér í lagi þar sem er að finna svefntjöld. Þá er vélin hugsuð sem varaaflstöð fyrir bækistöð sveitarinnar að Malarhöfði ef hnökrar verða á dreifingu rafmagns á höfuðborgarsvæðinu, enda annar hún vel lágmarks þörf sveitarinnar fyrir rafmagn í aðgerðum.

—————-
Texti m. mynd: Nýja Herkules ljósavélin
Höfundur: Ólafur Jón Jónsson

Landsmót hestamanna 2012 hefur samið við björgunarsveitir um gæslu á mótinu í Reykjavík í sumar. Sveitirnar sem annast gæsluna eru FBSR, Ársæll, Kjölur og HSSR. Mótið fer fram í Víðidal dagana 25.júní til 1.júlí. Um nokkuð stórt verkefni er að ræða og er það vonandi geta félagar séð degi eða dögum við gæslu á mótinu.

Fyrir hönd HSSR munu þeir Tómas og Stefán Baldur halda utan um verkefnið ásamt Hlyn, starfsmanni HSSR. Á næstu vikum verður gengið frá vaktaplani og þá verður opnað fyrir skárningu.

—————-
Höfundur: Haukur Harðarson

Samningur um gæslu á Laugardalsvelli milli KSÍ, Hjálparsveitar skáta í Reykjavík og Hjálparsveitar skáta í Garðabæ hefur verið endurnýjaður til tveggja ára. Gert er ráð fyrir sjö til átta gæsluverkefnum og eins og venjulega tengjast þau fótbolta, landsleikjum og bikarkeppni. Leikirnir þetta sumar verða líklega átta til níu.

—————-
Höfundur: Haukur Harðarson

Úthlutað var úr styrktarsjóði Isavia á formannafundi Landsbjargar sem haldinn var í Háskólanum í Reykjavík sl. laugardag. Helsta markmið sjóðsins er að styrkja viðbragð björgunarsveita í hópslysum og er sérstök áhersla lögð á sveitir sem gegna hlutverki við flugslysaviðbúnað á áætlunarflugvöllum landsins. Björn Óli Hauksson forstjóri Isavia sagði hann að með stofnun styrktarsjóðs Isavia vildi félagið leggja sitt af mörkum til þess að styðja frábært starf björgunarsveitanna sem lékju afar mikilvægt hlutverk í öllum hópslysaviðbúnaði í landinu.

HSSR fékk styrk að upphæð 350 þúsund og á stjórnarfundi var ákveðið að HSSR legði 150 þúsund til viðbótar við upphæðina. Þannig verður upphæðin sem varið verður til kaupa á búnaði sem nýtist í hópslysum 500 þúsund og verður stýring á ráðstöfun í höndum sjúkrahóps.

—————-
Höfundur: Haukur Harðarson

Í tilefni af 80 ára afmæli Hjálparsveitar skáta í Reykjavík verður ferðafólki boðið upp á námskeið í rötun og ferðamennsku. Þetta er grunn kynning á notkun korta, áttavita og GPS auk þess sem farið verður yfir helsta búnað sem ferðafólk ætti að hafa með sér á ferðalagi um landið.
Fyrir nokkrum árum síðan bauð HSSR rjúpnaskyttum og ferðafólk upp á sams konar námskeið og mæltust þau vel fyrir. Öll þekking á meðferð korta og leiðsögubúnaðar eykur öryggi í ferðamennsku og gerir ferðina betri.
Námskeiðið verður haldið í húsnæði HSSR að Malarhöfða 6 (fyrir ofan Ingvar Helgason) þriðjudaginn 15. maí kl. 20. Það er öllum opið og aðgangur er ókeypis.

—————-
Texti m. mynd: Áttaviti á að vera staðalbúnaður
Höfundur: Ólafur Jón Jónsson