Sleðahópur hefur verið töluvert á ferðinni viku fyrir og eftir páska og um páskana.

Eiríkur og Þorvaldur fóru austur á land helgina fyrir páska og voru þar í samfloti með Kyndilsmönnum og fleiri sveitum. Austfirðingar leiddu þá um fjöll og dali þar í fínu veðri. Svo fóru Eiríkur og Þorvaldur í Landmannalaugar um páska og keyrðu þar vítt og breytt um, til að kynnast svæðinu og tækjunum, Boli átti að vera þar líka og fór inn fyrir Sigöldu en er þangað var komið var mikill krapi og snéru Bolamenn við.

Um þessa helgi vorum við enn á ferðinni og var Eiríkur (títt nefndur) með Kyndilsmönnum (hvaða samband er þetta hjá Eiriki og Kyndilsmönnum) fyrir norðan og þeir keyra um fjöll þar og enda svo á námskeiði mánudag og þriðjudag.

Við sem heima sátum (Hlynur Snæland, Snorri, Sveinbjörn) fengum fiðring þegar við sáum allan þennan snjó í morgun og drifum okkur inn að Vörðu og keyrðum þar í slæmu skyggni en góðu færi og nægum af snjó. Höfðum virkilega gott af því að keyra þessa leið í svona lélegu skyggni, þarna er töluverð umferð sleðamanna og mikið um brekkur, gil og hengjur. Við töldum alveg ástæðu fyrir okkur að læra betur á svæðið og þar af leiðandi var veðrið ekki látið stoppa okkur.

Takk fyrir, Sveinbjörn.

—————-
Höfundur: Sveinbjörn Steinþórsson

Stjórn HSSR hefur tekið þá ákvörðun að tækjahópi verði skipt upp í tækjahóp annarsvegar og beltahóp hins vegar. Í umsjón beltahóps verða Boli og vörubíllinn. Hópstjórar í beltahóp verða Hlynur Skagfjörð og Halldór Ingi Ingimarsson.

Hjá tækjahóp bætist einn hópstjóri við þá Davíð og Gumma og er það Kjartan Óli Valsson. Hópstjórar þar verða því þrír.

Einnig verða breytingar á hópstjórum hjá sérhæfðum leitarhóp, Svava hættir sem hópstjóri, Þorvaldur verður áfram en hópstjóri með honum verður Hanna Lilja Jónasdóttir.

—————-
Höfundur: Haukur Harðarson

Í dag, föstudaginn 15. apríl, var undirritaður samningur milli björgunarsveita í Reykjavík og Reykjavíkurborgar styrktarsamningur. Samningurinn er til þriggja ára, árlega upphæð til sveitanna 8 miljónir og heildarupphæð á samningstímabilinu 24 milljónir króna. Það felst mikil viðurkenning á okkar starfi frá hendi borgarinnar með þessum samning, sérstalega er það gott að hægt var að gera samningin til svo langs tíma. Aðilar að samningnum auk HSSR er Ársæll, FBSR og Kjölur.

—————-
Texti m. mynd: Undirritun
Höfundur: Haukur Harðarson

Nú er verið að skipta um reimar í beltum á Bola. Skipt er um allar reimar en spyrnurnar eru notaðar áfram. Þetta er mikil skrúfuvinna því auk þess að skipta um reimarnar er skipt um alla 1500 boltana sem halda spyrnunum föstum. Hér er um eðlilegt viðhald að ræða en til að efla kostnaðarvitund má geta þess að varahlutapakkinn kostar um 1,8 miljónir.
Verkinu á að ljúka í dag, þriðjudag því síðan er Boli að fara á Langjökul í mælingarverkefni fram á laugardag/sunnudag. Síðan styttist í páskavaktina í Laugum.

—————-
Höfundur: Haukur Harðarson

Nýverið fengum við skemmtilega heimsókn frá unglingunum í Stíg, en áður höfðum við fengið í heimsókn unglingana á Tröð. Gestirnir fengu leiðsögn um aðstöðu HSSR og stutt yfirlit yfir sögu sveitarinnar áður en þeir fengu að kynnast því sem skemmtilegast er; því sem gerist þegar kemur útkall. Þar var farið yfir flest allt sem viðkemur þjálfun og búnaði sveitarinnar ásamt lýsingu á því ferli sem fer í gangi í útkalli. Krakkarnir voru óhrædd við að spyrja um allt á milli himins og jarðar sem gerði þessa heimsókn enn skemmtilegri.

Við hjá HSSR þökkum kærlega fyrir frábæra heimsókn og skilum góðum kveðjum til þessara hressu krakka.

—————-
Texti m. mynd: Hressir krakkar við snjóbílinn Bola
Höfundur: Ólafur Jón Jónsson

Reykur Boli verður í hálendisgæsluverkefni í hringum Landmannalaugar um Páskana.

Ef það er áhugi hjá gönguskíðafólki úr HSSR að fara inn í laugar um páskana, þá getum við flutt fyrir hópinn mat og búnað úr Sigöldu á laugardagsmorgun, niður í Landmannalaugar ef áhugi er fyrir því.

Áhugasamir þurfa að gera egin ráðstafanir varðandi gistingu í Landmannalaugum, hvort sem er í skála eða tjaldi.

Sendið mér línu maddi@maddinn.net ef þið hafið áhuga.

—————-
Höfundur: Marteinn S. Sigurðsson

Undanfarnar tvær helgar hefur sleðahópur verið á ferðinni og fóru á Grímsfjall með Bola og aðstoðuðu við olíflutninga og keyrðu svo um fjallabak á leið heim. Um síðustu helgi fór hópurinn í æfingarferð í fjöllin inn af Lyngdalsheiði í flottu veðri og góðum snjó.

Þeir sem hafa áhuga á sleðahóp er bent á að hópurinn er með fundi á þriðjudögum kl.20

Fleiri myndir í myndaalbúmi.

—————-
Höfundur: Kjartan Þór Þorbjörnsson

Þriðjudaginn 5. apríl verður Leggjabrjótur genginn í gönguröðinni Fjall kvöldsins. Það verða þau Hanna Lilja og Ottó Ingi sem munu leiða fólk yfir Leggjabrjótinn. Leggjabrjótur er skemmtileg forn þjóðleið milli Þingvalla og Botnsdals/Brynjudals. Áætla má að gangan taki 4-5 klst. og því verður lagt af stað frá M6 kl. 17. Eins og áður er akstur á vegum sveitarinnar en við grípum til einkabílsins ef þörf verður á.

Nánari upplýsingar um leiðina má m.a. finna hérna: http://kjos.is/frodleikur-ur-kjos/hreppslysing-sr-gunnars-kristjanssonar/leggjabrjotur/ og hér er sniðugt kort: http://www.bikemap.net/route/641202#lat=64.34258&lng=-21.20705&zoom=11&type=2

Lagt er til að mannbroddar verði í bakpokanum svona til öryggis, ásamt höfuðljósi vatni, nesti og öðrum persónulegum nauðsynjum.

Sjáumst hress

—————-
Höfundur: Íris Lind Sæmundsdóttir

Á sveitarfundi síðastliðinn þriðjudag var undirritaður samningur milli Slysavarnafélagsins Landsbjargar og Hjálparsveitar skáta í Reykjavík varðandi húsnæði og fatnað Íslensku alþjóðabjörgunarsveitarinnar (ÍA).
Í honum felst m.a. að HSSR mun hafa með höndum almenna umsjón húsnæðis ÍA og uppbyggingu þess, framkvæmda og breytinga í samráði við stjórnendur ÍA og SL. Einnig að sjá til þess að húsnæðið sé hreint og tilbúið til notkunar öllum stundum. Einnig mun HSSR sjá um allan fatnað sveitarinnar sem og annan einstaklingsbúnað eins og hjálma, bakpoka, ljós og fleira.
SL ber allan kostnað af rekstri húsnæðisins, fatnaði og einstaklingsbúnaði og útvegar aðgang að flugverndarsvæðinu fyrir fjóra félaga HSSR.

Mynd: Haukur Harðarson, Sveitarforingi HSSR og Hannes Frímann Sigurðsson úr stýrihópi ÍA undirrituðu samninginn.

—————-
Höfundur: Haukur Harðarson

Mjög stór hópur skrifaði undir eiðstaf HSSR á síðasta sveitarfundi. Er hópurinn að mestu afrakstur nýliðaþjálfunar sem hófst haustið 2009. Til gamans má geta þess að einstaklingar sem hófu nýliðaþjálfun þá voru 72. Alls skrifuðu 23 nýir félagar undir á sveitarfundinum auk þess sem ein úr hópnum skrifaði undir á stjórnarfundi í vikunni áður vegna fyrirsjáanlegar fjarveru á sveitarfundi.

Eldri félagar HSSR bjóða þau velkominn alla leið og horfa fram á langt og árangursríkt samstarf.

Þau sem bættust í hópinn núna eru:
Arnar Halldórsson, Ástþór Gíslason, Baldur Árnason,
Berglind Ósk Guðnadóttir, Birgir Blöndahl Arngrímsson, Brynjar Jóhannesson,
Brynjar Örn Ellertsson, Elín Lóa Baldursdóttir, Helgi Þór Leifsson,
Íris Lind Sæmundsdóttir, Kristín Sigurbjörnsdóttir, Kristjón Sverrisson,
Oddur Valur Þórarinsson, Ólafur Jón Jónsson, Ragnheiður Aradóttir,
Rún Knútsdóttir, Sigurbjörg Erla Egilsdóttir, Sigurlína M Pech,
Snæbjörn Guðmundsson, Stefan Johannes van Nierop, Svavar Jónsson,
Þórey Rósa Einarsdóttir og Vilhelm S. Sigurðsson.
Fyrir hafði Þorbjörg Hólmgeirsdóttir skrifað undir.

—————-
Texti m. mynd: Nýir HSSR félagar.
Höfundur: Haukur Harðarson