Category Archives: Fréttir

Samningur HSSR við Orkuveituna

Belinda Eir og Tommi gjadkeri handsala samning sumarsins.

Belinda Eir og Tommi gjaldkeri handsala samning sumarsins.

Nú í morgun var skrifað undir samning HSSR og Orkuveitu Reykjavíkur um viðhald gönguleiðakerfis OR á Hengilssvæðinu. Þetta er tíunda árið í röð sem að HSSR sinnir þessu verkefni fyrir OR og hefur samstarfið gefist vel fyrir báða aðila. Þrátt fyrir að samningur hafi ekki verið undirritaður fyrr en í morgun hafa HSSR félagar þó þegar hafið störf á svæðinu. Sumarbyrjunin hefur reyndar verið bæði köld og vætusöm og því viðbúið að verkefnið teygist eitthvað lengra fram á sumarið en undanfarin ár.

Nú er um að gera að sitja um góðu dagana og nýta þá vel á Hengilssvæðinu.

HSSR konur bjarga deginum!

Inga og Björg

Þann 12. júní sl. kl. 12:22 barst útkall F1 Rauður vegna slyss í fjalllendi, en tilkynnt hafði verið um einstakling í vanda á Esjunni. Félagar í HSSR brugðust hratt við og tóku tólf þeirra beinan þátt í aðgerðinni í tveimur hópum sem héldu strax áleiðis á vettvang.

Meðal þeirra sem móttóku útkallið voru Björg Guðmundsdóttir og Ingibjörg Markúsdóttir sem fengu réttindi sem fullgildir björgunarmenn í HSSR í vor. Þær voru í venjubundinni heilsubótargöngu á leiðinni upp að Þverfellshorni og voru komnar rúmlega hálfa leið þegar kallið barst. Brugðust þær skjótt við og hlupu við fót áleiðis upp fjallið þar til þær komu á vettvang. Þegar þangað var komið tóku þær strax yfir formlega stjórn og deildu svo með sér verkum. Björg, sem er starfandi hjúkrunarfræðingur, hóf strax að sinna þolandanum og Ingibjörg setti sig í samband við Neyðarlínu til þess að koma á framfæri upplýsingum um framgang á vettvangi. Eftir góða aðhlynningu braggaðist þolandinn sæmilega og gat fljótlega staðið upp. Mátu björgunarkonurnar stöðuna þannig að þær myndu aðstoða hann við að koma sér niður af fjallinu og var hópurinn farinn af stað þegar þyrlusveit Gæslunnar bar að. Þá fóru björgunarkonurnar í þann ham að gera þolandann kláran til flutnings og að taka á móti sigmanni. Gekk sú aðgerð hratt og greiðlega fyrir sig og komst þolandinn fljótt á sjúkrahús.

Félagi í svæðisstjórn á svæði 1 lauk lofsorði á aðkomu okkar kvenna og sagði að viðbrögð þeirra hefðu verið rétt og hefðu þær m.a. komið fljótt á framfæri réttum upplýsingum um staðsetningu vettvangs.

Það er gaman að greina frá því að þetta er í annað skiptið sem Ingibjörg er fyrst björgunarfólks á vettvang á Esjunni því í vetur lenti hún í álíka kringumstæðum. Því er ljóst að það eru töggur í nýjustu liðsmönnum Hjálparsveitar skáta í Reykjavík!

Landsþing Landsbjargar

Haukur tekur við nýjum kortagrunni frá Marteini S. á Landsþinginu á Akureyri

Landsþing Slysavarnafélagsins Landsbjargar var haldið á Akureyri fyrir stuttu. Þetta var nokkuð friðsælt þing, farið var yfir skýrslu stjórnar, reikninga og unnið var með framtíðarsýn. Það var ánægjulegt að sjá að jafnvægi virðist vera að komast á rekstur þrátt fyrir minnkandi tekjur. Stjórn var að mestu endurkjörinn, Hörður Már verður formaður áfram en nýliðar í stjórn eru Leonard Birgisson frá Súlum Akureyri og Þorvaldur Friðrik Hallsson Ársæl Reykjavík. Fulltrúar stjórnar HSSR á þinginu voru Kristjón, Sigþóra, Þorbjörg og Haukur. Auk þess tók lið frá okkur þátt í Björgunarleikunum og stóð sig vel. Einnig tókum við þátt í blönduðu liði.

Continue reading →

Landssöfnun Landsbjargar

Í gær, föstudag, var haldin landssöfnun fyrir Landsbjörgu þar sem meðal annars var safnað í Bakvarðasveit félagsins. Meðlimir HSSR stóðu vaktina, hvort tveggja í innhringiverinu og uppi við Búhamra þar sem fjallabjörgunarhluti útsendingarinnar fór fram.

Búðahópur setti upp tjaldið við stjórnstöðvarbíl Svæðisstjórnar, Björninn, og fjallahópur hélt upp í hamrana þar sem sett var upp kerfi til að slaka þolanda niður klettana.

Allt gekk að óskum og veðrið spilaði með, hellidembunni sem spáð var stytti upp svo samræmi var milli beinu útsendingarinnar og uppfylliefnisins sem tekið var upp um miðjan mánuðinn.

Continue reading →

Bakvarðasveitin

Við minnum á skemmtilega sjónvarpsdagskrá sem hefst í kvöld kl. 19.40 á Rúv þar sem fjallað verður um björgunarstarf á Íslandi frá ýmsum sjónarhornum. Hverjir eru í björgunarsveitunum og hvað gerir þetta fólk? Þessum spurningum og mörgum öðrum verður svarað í kvöld í skemmtilegum fróðleiksmolum í bland við drama, grín og spennu.

Megin tilgangurinn með þessari dagskrá er þó sá að fá fólk í Bakvarðasveit Slysavarnafélagsins Landsbjargar sem styður við starfið með reglulegum fjárframlögum. Annríki í starfi björgunarsveita hefur aukist á undanförnum árum og þess vegna er nauðsynlegt að sem flestir gangi til liðs við Bakvarðasveitina og leggi sitt lóð á vogarskálarnar.

GSM miðunarverkefnið NORRIS

Á dögunum var komið að máli við nokkrar björgunarsveitir á Höfuðborgarsvæðinu með að aðstoða við verkefni sem Rögg er að þróa í samstarfi við Landhelgisgæsluna. Verkefnið gengur út á að miða út GSM síma úr þyrlu með því að fljúga yfir leitarsvæði með sérhannaðan búnað. Með þessu má hvort tveggja finna síma utan þjónustusvæðis og auka nákvæmni miðunarinnar úr um 530 metrum niður í um 60 metra.

Þyrlusveit Landhelgisgæslunnar hefur verið að gera tilraunir við að miða út síma í mismunandi landslagi. Fyrir mælingar í jökulsprungum var kosið að leita til björgunarsveitanna við að finna og koma símum niður í sprungur.

Flogið var með TF-SIF á Sólheimajökul og hentugir svelgir fundnir. Veður var með afbrigðum gott og aðgerðin gekk vel.

Continue reading →

Allir öruggir heim

Þorbjörg ásamt nokkrum kátum vestisþegum.

Nú í maí hafa félagar í HSSR farið í nokkra grunnskóla í Reykjavík og afhent skólunum endurskinsvesti til eignar. Vestin eru ætluð nemendum í fyrsta bekk þegar þau fara í ferðir út fyrir skólalóðina.

Það er Slysavarnafélagið Landsbjörg, í samvinnu við Alcoa Fjarðarál, Dynjanda ehf, EFLA verkfræðistofu, Eflingu stéttafélag, HB Granda, Isavia, Landsvirkjun, Neyðarlínuna, Tryggingamiðstöðina, Umferðarstofu og Þekkingu, sem gefur öllum grunnskólum landsins þessi endurskinsvesti til að nota í vettvangsferðum barna í 1. bekk. Á vestunum kemur fram númer Neyðarlínu, 112, en engar aðrar auglýsingar.

Þema þessa verkefnisins er „Allir öruggir heim“ því öll eigum við rétt á því að koma örugg heim og á það ekki síst við um þau sem eru að hefja skólagöngu sína. Að sjálfsögðu göngum við sem eldri eru á undan með góðu fordæmi og notum ávallt viðeigandi öryggisbúnað.

Undirbúningur fyrir söfnunarþátt á RÚV

Hvert augnablik fest á filmu.

Sunnudaginn 12. maí héldu nokkrir vaskir meðlimir HSSR upp undir Búahamra til undirbúnings fyrir söfnunarþátt sem Slysavarnarfélagið Landsbjörg stendur fyrir í samvinnu við RÚV. Gert er ráð fyrir blandaðri dagskrá; innslög eru t.d. viðtöl við fólk úr sveitum og deildum, skjólstæðinga og aðstandendur, klippur úr starfi félagsins, tónlist, grín og glens.

Lagði sveitin fram búðatjaldið og mannskap í það auk fjallabjörgunarhóps til töku á forunnu efni. Tjaldið var sett upp undir hömrunum við stjórnstöðvarbílinn Björninn en fjallabjörgun sett upp í klettunum. Continue reading →

Samæfing í fjallabjörgun

Danni og Brynjar ganga frá öllum spottum áður en sá síðarnefndi sígur niður til Bjarka sem þurfti að bjarga

Samæfing HSSR í fjallabjörgun í umsjón undanfara var haldin 4. apríl. Farið var í Stardal þar sem þrír nýliðar dingluðu í línum fastir í háum þverhníptum kletti. Það þurfti að ná þeim niður og bera í börum niður í bíl. Unnið var í þremur hópum undir leiðsögn Ásdísar, Ottós og Dana Más og tókst að ná öllum þremur niður og koma á börur. Einkar vel heppnuð æfing í blýðskaparveðri með um 30 þátttakendum. Myndir frá æfingunni má skoða hér.

Páskaferð á Snæfellsjökul

Almenn páskaferð HSSR þetta árið var skíða- og gönguferð á Snæfellsjökul. Dagurinn vandlega valinn skírdagur, þannig að skyggni yrði ekkert og ekkert nema helvítis rok á fjallinu! Það var reyndar meinleysisveður þegar lagt var af stað en það hvessti eftir því sem ofar dró. Fréttum frá vélsleðamönnum á keiðinni að aðstæður vera afleitar eða hefðu í öllu fallið verið það daginn áður. Jökullinn eitt klakastykki og erfiður yfirferðar. Ekki neitt harðfenni heldur bara klaki. Það hafði hins vegar snjóað eitthvað þannig að klakinn var ekki til trafala til að byrja með.

Hópurinn hafði auðvitað ekki neinn sérstakan áhuga á því að elta snjóbílasóð og fóru sínar eigin leiðir áleiðs upp. Þar var boðið upp á góðan hliðarhalla og á köflum einhverja snjóflóðahættu en samt allt innan marka. Það hvessti alltaf meira og meira og varð svo að lokum skítkalt. Klakinn var hins vegar næstum alla leið upp hulinn góðu snjólagi sem hafði komið líklega nóttina áður. Það brást svo rétt fyrir neðan þúfurnar og varð það til þess að snúið var við. Þetta átti víst eftir allt saman mestmegnis að vera skemmtiferð en ekki bara æfing í að ganga á skíðum eða ekki skíðum upp brekku í vondu veðri án þess að sjá nokkurn skapaðan hlut. En jú, þetta endaði á að vera hvort tveggja!

Niðurferðin gekk að sjálfsögðu bara vel og var skíðað af kappi. Hópurinn var haldinn á jöklinum en svo var bara skíðað eða ekki skíðað eftir getu hvers og eins. Margir voru á fjallaskíðum og kunnu með þau að fara. Það var loks hressa liðið sem skildi eldra og lélegra skíðaliðið eftir. Svo voru aðrir eins og undirritaður sem hafði ekki stigið á svigskíði í heilt ár og var einhvern veginn á dularfullan hátt kominn í plógskíðabeygjustílinn! Aðrir voru á gönguskíðum og var hver með sinn stíl en skinnastíllinn var vinsæll í efri hluta fjallsins þar sem brattinn var meiri. Nú og svo mátti líka alveg vera gangandi þarna líka. Sem sagt allt leyfilegt á fjöllum!